लोकस्पर्श न्यूज नेटवर्क
गडचिरोली : लोकशाहीतील मताच्या किमतीची तीव्र जाणीव करून देणारा निकाल गडचिरोली नगर परिषदेच्या प्रभाग क्रमांक ४-बीत समोर आला असून, केवळ एका मताच्या फरकाने ठरलेल्या या विजयाने भाजप आणि काँग्रेस या दोन्ही पक्षांच्या राजकीय यंत्रणांना अस्वस्थ केले आहे. २० डिसेंबर रोजी झालेल्या मतदानानंतर लागलेल्या या निकालामुळे एका प्रभागापुरते मर्यादित असलेले प्रकरण थेट जिल्ह्याच्या राजकीय चर्चेच्या केंद्रस्थानी पोहोचले आहे.
मतमोजणीअंती काँग्रेसचे श्रीकांत देशमुख यांना ७१७, तर भाजपचे संजय मांडवगडे यांना ७१६ मते मिळाल्याचे स्पष्ट झाले. पोस्टल बॅलेटमधील एका अतिरिक्त मतामुळे देशमुख यांच्या बाजूने कौल लागला. मात्र, हा निकाल जाहीर होताच भाजपकडून तात्काळ पुनर्मोजणीची मागणी करण्यात आली आणि त्यामुळे काही काळ निकालाची अधिकृत घोषणा रोखून धरली गेली.
भाजपने उपस्थित केलेला आक्षेप केवळ आकड्यांपुरता मर्यादित नव्हता. प्रभागातील प्रत्यक्ष मतदान २० डिसेंबर रोजी झाले असताना, २ डिसेंबरच्या मतदानासाठी आलेल्या पोस्टल बॅलेटमधील मतांचा समावेश कसा करण्यात आला, हा मुद्दा भाजपने उपस्थित करत त्या मतांच्या वैधतेवर प्रश्नचिन्ह निर्माण केले. या पार्श्वभूमीवर एका मताने विजयी ठरलेल्या देशमुख यांना विजयाचे प्रमाणपत्र देण्यास निवडणूक निर्णय अधिकाऱ्यांनी तात्पुरता नकार देत निर्णय प्रलंबित ठेवला.
या विलंबावरून राजकीय वातावरण अधिकच तापले. निवडणूक निर्णय अधिकारी सत्ताधाऱ्यांच्या दबावाखाली काम करत असल्याचा आरोप करत काँग्रेसचे जिल्हाध्यक्ष महेंद्र ब्राह्मणवाडे यांनी थेट संपूर्ण निवडणूक प्रक्रिया स्थगित करण्याची मागणी केली. त्यामुळे हा वाद निवडणूक प्रशासनाच्या विश्वासार्हतेपर्यंत पोहोचला.
अखेर निवडणूक आयोगाकडून स्पष्ट मार्गदर्शन प्राप्त झाल्यानंतर निवडणूक निर्णय अधिकारी स्मिता बेलपत्रे यांनी संध्याकाळी श्रीकांत देशमुख यांना विजयाचे प्रमाणपत्र प्रदान केले. मात्र, हा निर्णय अंतिम नसून, आपला आक्षेप कायम असल्याचे स्पष्ट करत भाजप न्यायालयात दाद मागणार असल्याची भूमिका जिल्हा महामंत्री गोविंद सारडा यांनी जाहीर केली.
एका मतावर ठरलेला हा निकाल केवळ प्रभाग ४-बीच्या राजकारणापुरता मर्यादित न राहता, निवडणूक प्रक्रियेतील सूक्ष्म नियम, पोस्टल बॅलेटची वैधता आणि लोकशाही व्यवस्थेतील पारदर्शकतेचा प्रश्न पुन्हा एकदा ऐरणीवर आणणारा ठरला आहे. गडचिरोलीच्या राजकीय इतिहासात हा निकाल ‘एका मताची सत्ता’ म्हणून नोंदला जाण्याची शक्यता व्यक्त केली जात आहे.