लोकस्पर्श न्यूज नेटवर्क
गडचिरोली: एटापल्ली तालुक्यातील हेडरी येथील लॉयड्स काली अम्मल मेमोरियल (एलकेएएम) रुग्णालयात वैद्यकीय उत्कृष्टतेचा नवा अध्याय लिहिला गेला. ४.६३ किलो वजनाचं नवजात बाळ २७ जुलै रोजी सामान्यत सिझेरियनसारख्या शस्त्रक्रियेची गरज भासणाऱ्या वजनाच्या या बाळाचा जन्म संपूर्णपणे नैसर्गिक पद्धतीने, कोणतीही शस्त्रक्रिया किंवा एपिसिओटॉमी न करता यशस्वीरित्या पार पडला. बाळ आणि आई दोघंही पूर्णपणे निरोगी असून, गडचिरोलीसारख्या दुर्गम भागात अशा स्वरूपाचा यशस्वी आणि सुरक्षित प्रसंग हा अत्यंत दुर्मीळ मानला जातो.
बाळाचा जन्म गडचिरोली जिल्ह्यातील मुलचेरा तालुक्यातील सुंदरनगर येथील एका मधुमेहविरहित तरुण मातेकडून झाला असून, प्रसूतीदरम्यान ‘शोल्डर डायस्टोसिया’सारख्या जटिल वैद्यकीय स्थितीशी सामना करत रुग्णालयाच्या कुशल आणि अनुभवी वैद्यकीय पथकाने ही प्रसूती यशस्वीपणे पार पाडली. अशा स्थितीत गर्भाच्या खांद्याचा अडथळा मातोश्रीच्या श्रोणिमध्ये निर्माण होतो, ज्यामुळे बाळाच्या जन्मास धोका निर्माण होतो — मात्र एलकेएएम रुग्णालयातील डॉक्टरांच्या सामूहिक कौशल्याने ही गुंतागुंतही मात केली.
ही वैद्यकीय घटना केवळ एका प्रसूतीचे यश नाही, तर एलएमईएल अर्थात लॉयड्स मेटल्स अँड एनर्जी लिमिटेडच्या आरोग्यविषयक सामाजिक बांधिलकीचं मूर्तस्वरूप आहे. व्यवस्थापकीय संचालक बी. प्रभाकरन यांची जिल्ह्यातील दर्जेदार आरोग्यसेवेप्रती असलेली दूरदृष्टी, आणि लॉयड्स इन्फिनिट फाउंडेशनच्या संचालिका सुश्री कीर्ती रेड्डी यांचं सततचं मार्गदर्शन यामागे अधोरेखित होतं. गडचिरोलीसारख्या आदिवासीबहुल आणि आरोग्यदृष्ट्या सेवावंचित जिल्ह्यात एक प्रगत, विश्वासार्ह आणि निःस्वार्थ वैद्यकीय सेवा देण्याचं जे ध्येय एलकेएएम रुग्णालयाने उराशी बाळगलं आहे, ती ही घटना प्रभावीपणे अधोरेखित करते.
सामान्यत ४ किलोहून अधिक वजनाच्या बाळांचा नैसर्गिक जन्म ही वैद्यकीयदृष्ट्या अत्यंत आव्हानात्मक बाब असते. देशाच्या महानगरांमध्येही अशा परिस्थितीत तात्काळ सिझेरियनचा पर्याय स्वीकारला जातो. परंतु गडचिरोलीसारख्या दुर्गम भागात, उच्च प्रशिक्षित डॉक्टरांच्या समर्पित प्रयत्नांतून अशा पद्धतीने घडलेला प्रसंग, हा ग्रामीण आरोग्यव्यवस्थेच्या नव्या युगाची सुरूवात ठरतो.
ही घटना फक्त रुग्णालयासाठी गौरवाची बाब नसून, गडचिरोली जिल्ह्यातील तमाम कुटुंबांसाठी आश्वासक संकेत देणारी आहे — की आता ग्रामीण मातांना देखील परवडणारी, तज्ज्ञांकडून मिळणारी आणि विश्वासार्ह आरोग्यसेवा त्यांच्या दारात पोहोचू शकते.
आज, जेव्हा देशभरात मातामृत्यू आणि नवजात बाळमृत्यूचे प्रमाण ग्रामीण भागात अधिक आहे, तेव्हा लॉयड्स काली अम्मल मेमोरियल हॉस्पिटलमध्ये घडलेली ही घटना आरोग्य आणि माणुसकीच्या युतीचं अत्यंत प्रेरणादायी उदाहरण ठरते.