लोकस्पर्श न्यूज नेटवर्क
नागपूर/गडचिरोली : खनिज संपत्तीचा वापर करताना पर्यावरणीय समतोल राखणे, नैसर्गिक साधनसंपत्तीचे दीर्घकालीन संवर्धन करणे आणि जबाबदार खाणकामाच्या शास्त्रीय पद्धती अंगीकारणे ही आजच्या औद्योगिक युगातील सर्वात मोठी गरज बनली आहे. याच पार्श्वभूमीवर देशातील खाण उद्योग कोणत्या दिशेने वाटचाल करीत आहे, याचे स्पष्ट आणि आश्वासक चित्र नागपूर येथे भरविण्यात आलेल्या ३६व्या मायन्स एन्व्हायर्नमेंट अँड मिनरल कन्झर्व्हेशन (MEMC) सप्ताहातून समोर आले.
नागपूर येथील हॉटेल रीजेंटा येथे आयोजित या राष्ट्रीय स्तरावरील कार्यक्रमात देशभरातील खाण उद्योगाशी संबंधित तज्ज्ञ, वरिष्ठ अधिकारी, उद्योग प्रतिनिधी आणि धोरणकर्ते सहभागी झाले होते. भारतीय खान ब्युरो (IBM) यांच्या मार्गदर्शनाखाली दरवर्षी आयोजित होणाऱ्या या प्रतिष्ठित सप्ताहात पर्यावरण संरक्षण, शाश्वत खाणकाम, खनिज संवर्धन तसेच आधुनिक तांत्रिक उपाययोजनांबाबतचे अनुभव, उत्तम पद्धती आणि नवकल्पना सादर करण्यात आल्या.
देशाच्या वाढत्या औद्योगिक गरजांच्या पार्श्वभूमीवर खाण उद्योगाने केवळ उत्पादनक्षमतेपुरते मर्यादित न राहता सामाजिक आणि पर्यावरणीय जबाबदारी स्वीकारणे किती महत्त्वाचे आहे, यावर या सप्ताहात विशेष भर देण्यात आला. विकास आणि संवर्धन यांचा समतोल राखत खाणकाम कसे करता येईल, याबाबत सखोल चर्चा आणि मंथन झाले.
या MEMC सप्ताहात लॉयड्स मेटल्स अँड एनर्जी लिमिटेड (LMEL) यांच्या सुरजागड आयर्न ओअर माइन्सने आपल्या कामगिरीचा ठसा उमटवत ‘फुली-मेकनाइज्ड ओपन कास्ट माइन्स’ या श्रेणीत संयुक्त द्वितीय पुरस्कार पटकावला. अल्ट्राटेक सिमेंटच्या नाओकारी लाइमस्टोन माइन्ससोबत संयुक्तपणे हा सन्मान प्रदान करण्यात आला. विशेष उल्लेखनीय बाब म्हणजे, हा पुरस्कार LMEL च्या महिला कर्मचाऱ्यांच्या टीमने स्वीकारला, ज्यामुळे खाण क्षेत्रातील महिलांचा वाढता सहभाग आणि नेतृत्वाची भूमिका अधोरेखित झाली.
या पुरस्कार वितरणप्रसंगी भारतीय खान ब्युरोचे वरिष्ठ अधिकारी, लॉयड्स मेटल्स अँड एनर्जी लिमिटेडचे अधिकारी तसेच विविध खाण संस्थांचे प्रतिनिधी उपस्थित होते. कार्यक्रमादरम्यान LMEL ने शाश्वत आणि जबाबदार खाणकामाबाबतची आपली ठाम भूमिका मांडली. ग्रीन माइनिंग पद्धती, बँडेड हेमेटाईट क्वार्ट्झाईट (BHQ) चे प्रभावी बेनिफिशिएशन, स्लरी पाइपलाईन प्रकल्प, पेलेट प्लांटचे संचालन आणि विविध सामाजिक उत्तरदायित्व उपक्रमांद्वारे केलेल्या कामगिरीची सविस्तर माहिती यावेळी सादर करण्यात आली.
या सप्ताहात LMEL च्या सहभागातील आणखी एक महत्त्वाचा पैलू म्हणजे त्यांच्या महिला कर्मचाऱ्यांचा आत्मविश्वासपूर्ण आणि परिपक्व संवाद. वरिष्ठ अधिकाऱ्यांसमोर आपल्या कामाचा अनुभव, तांत्रिक आव्हाने आणि उपाययोजना मांडताना महिलांनी दाखवलेली स्पष्टता, व्यावसायिक जाण आणि निर्णयक्षमता उपस्थितांनी विशेषत्वाने दखल घेतली. खाण उद्योगात समावेशकता आणि विविधतेला चालना देण्याच्या दृष्टीने हा सहभाग महत्त्वाचा मानला जात आहे.
लॉयड्स मेटल्स अँड एनर्जी लिमिटेडच्या या यशाबद्दल कंपनीचे व्यवस्थापकीय संचालक बी. प्रभाकरन यांनी समाधान व्यक्त करत, हरित, स्वच्छ आणि शाश्वत खाणकामाच्या दृष्टीकोनातून कंपनीने राबवलेल्या उपक्रमांचे कौतुक केले. राष्ट्रीय पातळीवर कंपनीचे प्रतिनिधित्व करणाऱ्या महिला कर्मचाऱ्यांच्या योगदानाची दखल घेत, महिला सक्षमीकरणाबाबतची कंपनीची दीर्घकालीन आणि ठोस बांधिलकी त्यांनी पुनः अधोरेखित केली.
या संयुक्त द्वितीय पुरस्काराव्यतिरिक्त, ३६व्या MEMC सप्ताहात सुरजागड आयर्न ओअर माइन्सने विविध क्षेत्रांत उल्लेखनीय कामगिरी करत अनेक पुरस्कार पटकावले. कमी दर्जाच्या खनिजांचे बेनिफिशिएशन व उपयोग या क्षेत्रात प्रथम पुरस्कार, वनीकरणासाठी प्रथम पुरस्कार, शाश्वत विकासासाठी द्वितीय पुरस्कार, पद्धतशीर व शास्त्रीय विकासासाठी तृतीय पुरस्कार, तसेच एकूण कामगिरीसाठी द्वितीय पुरस्कार मिळवून सुरजागड माइन्सने आपली गुणवत्ता अधोरेखित केली.
हे सर्व पुरस्कार म्हणजे शाश्वत खाणकाम, पर्यावरण संरक्षण आणि जबाबदार संसाधन व्यवस्थापनाच्या दिशेने लॉयड्स मेटल्स अँड एनर्जी लिमिटेडने केलेल्या सातत्यपूर्ण प्रयत्नांची आणि नेतृत्वाची ठोस पुष्टी असल्याचे मानले जात आहे.