लोकस्पर्श न्यूज नेटवर्क
चंद्रपूर :वन्यजीवांची बेकायदेशीर शिकार करून त्यांची वाहतूक करणाऱ्या दोघा इसमांना स्थानिक गुन्हे शाखा, चंद्रपूरच्या पथकाने ब्रम्हपुरी परिसरातून रंगेहात पकडले. या कारवाईत तीन मृत जंगली डुक्कर, एक भरमार बंदूक, जिवंत काडतुसे व इतर साहित्य जप्त करण्यात आले असून, दोन्ही आरोपींविरुद्ध वन्य प्राणी संरक्षण अधिनियम आणि शस्त्र अधिनियमाखाली गुन्हा दाखल करण्यात आला आहे.
ही कारवाई पोलीस अधीक्षक मुम्मका सुदर्शन व अपर पोलीस अधीक्षक ईश्वर कातकडे यांच्या मार्गदर्शनाखाली स्थानिक गुन्हे शाखेच्या पथकाने केली. रेल्वे क्रॉसिंगजवळ (ब्रम्हपुरी-आरमोरी रोड) सापळा रचून ही टोळी पकडण्यात आली.
ताब्यात घेतलेले आरोपी — कुंदनसिंग शेरसिंग भुराणी (३१) आणि विजयसिंग सुरतसिंग भुराणी (२१), दोघेही पेठ वॉर्ड, ब्रम्हपुरी येथील रहिवासी आहेत. हे आरोपी मोपेडवरून शिकारीचा बेकायदेशीर माल वाहून नेत असताना पोलिसांच्या जाळ्यात अडकले.
याप्रकरणी पुढील तपासासाठी वनविभागाकडे आरोपींचा ताबा सोपवण्यात आला आहे. कारवाईत पोनि. अमोल काचोरे यांच्या नेतृत्वाखाली सपोनि बलराम झाडोकर, पोउपनि संतोष निंभोरकर, पो.अं. गणेश भोयर, अजित शेंडे, नितेश महात्मे व प्रदीप मडावी यांचा सहभाग होता.