पुण्यात शिवनेरी किल्ल्यावर १७ ते १९ फेब्रुवारी दरम्यान हिंदवी स्वराज्य महोत्सव २०२५ चं आयोजन

लोकस्पर्श न्यूज नेटवर्क,

पुणे: छत्रपती शिवाजी महाराजांच्या ३९५ व्या जयंती निमित्त पुण्यात शिवनेरी किल्ल्यावर शंकरराव बुट्टे-पाटील विद्यालय मैदानाच्या प्रांगणात १७ ते १९ फेब्रुवारी दरम्यान हिंदवी स्वराज्य महोत्सव २०२५ चं आयोजन करण्यात आलं आहे. १७ तारखेला सकाळी १० वाजता मुख्यमंत्री देवेंद्र फडणवीस यांच्या हस्ते या भव्य सोहळ्याचं उद्धाटन होणार आहे, अशी माहिती पर्यटन मंत्री शंभूराज देसाई यांनी दिली आहे. महाराष्ट्र राज्य पर्यटन विभाग, पर्यटन संचालनालय आणि पुणे जिल्हा प्रशासनाच्या वतीनं या महोत्सवाचं आयोजन करण्यात आलं आहे. छत्रपती शिवरायांच्या जयंतीनिमित्त १७ ते १९ दरम्यान महाराष्ट्राची संस्कृती, कला, लोककला, सभ्यता आणि परंपरा दाखवणाऱ्या विविध कार्यक्रमांचा समावेश असलेल्या शिवजन्मोत्सवाचं आयोजन करण्यात आलं आहे.

या उद्धाटन समारंभाला उपमुख्यमंत्री एकनाथ शिंदे ,उपमुख्यमंत्री तसंच पुण्याचे पालकमंत्री अजित पवार, केंद्रीय सहकार आणि नागरी विमान वाहतूक राज्यमंत्री मुरलीधर मोहोळ, उच्च आणि तंत्रशिक्षण मंत्री चंद्रकांत पाटील, क्रीडामंत्री दत्तात्रय भरणे, विधानपरिषद उपसभापती नीलम गोऱ्हे, राज्यमंत्री माधुरी मिसाळ, इंद्रनील नाईक, राज्यसभा सदस्य मेधा कुलकर्णी, सुनेत्रा पवार, लोकसभा सदस्य सुप्रिया सुळे, श्रीरंग बारणे, डॉ. अमोल कोल्हे यांच्यासह इतर मान्यवर उपस्थित असतील.

व्हॉट्सअॅप ग्रुप ही लिंक वापरून जॉइन करा

महोत्सवात राज्यातल्या महिला बचतगटांच्या उत्पादनांना चालना देण्यासाठी विविध बचतगटांची उत्पादनं आणि खाद्य पदार्थाच्या स्टॉलचं प्रदर्शन लावण्यात येणार आहे. बैलगाडा शर्यत, आणि कबड्डी स्पर्धेचंही आयोजन करण्यात आलं आहे. तर शिवस्पर्श शिवसह्याद्री सरसेनापती उमाबाई दाभाडे प्रतिष्ठानच्या वतीनं शिवसह्याद्री ऐतिहासिक महानाटयाचा प्रयोग सादर केला जाणार आहे.
१८ तारखेला बचत गट साहित्याचा प्रदर्शनासह स्वरांजली कलामंचाच्या वतीनं गौरव माझ्या महाराष्ट्राचा या सांस्कृतिक कार्यक्रमाचं आयोजन करण्यात येणार आहे. तसंच शिवजयंतीच्या पार्श्वभूमीवर रात्री १२ वाजता छत्रपती शिवरायांना मानवंदना केलं जाईल. शिवजयंतीच्या दिवशी १९ फेब्रुवारीला जुन्नर तालुक्यातले गुणवंत कलाकार शिवकालीन खेळांची प्रात्यक्षिकं सादर करतील. संध्याकाळी शिवरायांची महाआरती शोभायात्रा काढण्यात येणार आहे. तसंच सुप्रसिद्ध पार्श्वगायिका वैशाली सामंत यांचा संगीत रजनी कार्यक्रम होणार आहे.