निर्यातीसाठी आंब्याची मँगोनेट प्रणालीने नोंदणी – ३१ मार्चपर्यंत नोंदणीची मुदत

लोकस्पर्श न्यूज नेटवर्क

नागपूर, दि. १२ डिसेंबर : आंबा निर्यात करण्यासाठी अपेडाच्या मँगोनेट प्रणालीद्वारे निर्यातक्षम आंबा बागांची नोंदणी युरोपियन युनियन व इतर देशांमध्ये केली जाते. यावर्षी  ७ हजार ९४४ निर्यातक्षम आंबा बागांची नोंदणी झालेली आहे. निर्यातक्षम आंबा बागांच्या नोंदणीसाठी मँगोनेट ही ऑनलाईन प्रणाली नुकतीच १ डिसेंबरपासून सुरू करण्यात आली आहे. निर्यातक्षम बागांच्या नोंदणीसाठी अपेडाने फार्म रजिस्ट्रेशन हे मोबाईल अ‍ॅप निर्माण केले आहे.

सदर अ‍ॅप डाऊनलोड करुन नोंदणी करता येईल. यासाठी सर्व आंबा बागायतदारांनी सन २०२०-२१ साठी संबंधित कृषी सहाय्यक, कृषी पर्यवेक्षक, कृषी अधिकारी व तालुका कृषी अधिकारी कार्यालय यांच्यासोबत संपर्क साधून त्वरित अर्ज करण्याचे आवाहन कृषी सहसंचालकांनी केले आहे. निर्यातक्षम आंबा बागांची नोंदणी ५ वर्षांसाठी वैध असेल. त्यामुळे गतवर्षी नोंदणी केलेल्या आंबा बागांची नव्याने नोंदणी, नुतनीकरण करण्याची आवश्यकता नाही. नव्याने नोंदणी करण्यासाठी विहीत नमुन्यातील अर्ज, सातबारा, ८ अ, बागेचा नकाशा आदी कागदपत्राची आवश्यकता आहे. मँगोनेटद्वारे नोंदणी करण्याची अंतिम मुदत ३१ मार्च २०२१ अशी आहे.  निर्यातक्षम बागाची वेळेत नोंदणी करण्यासाठी ३१ मार्चपर्यंत मुदत आहे.

व्हॉट्सअॅप ग्रुप ही लिंक वापरून जॉइन करा