लोकस्पर्श न्यूज नेटवर्क,
कुशल पंधरामचे हे यश केवळ एका विद्यार्थ्याच्या गुणवत्तेचे प्रतीक नाही; तर योग्य मार्गदर्शन, आधुनिक शिक्षणपद्धती, सातत्यपूर्ण सराव आणि जिद्दीच्या बळावर ग्रामीण भागातील विद्यार्थी देखील राष्ट्रीय स्तरावर चमकू शकतो, याची ही प्रेरणादायी साक्ष आहे. वडसा येथील स्काय नेट पब्लिक स्कूल ने, गुणवत्तापूर्ण शिक्षण, नाविन्यपूर्ण अध्यापन पद्धती आणि विद्यार्थ्यांच्या सर्वांगीण विकासाचा ध्यास घेतलेल्या शाळेने पुन्हा एकदा राष्ट्रीय स्तरावर आपल्या गुणवत्तेची मोहोर उमटवली आहे. शाळेतील इयत्ता तिसरीचा विद्यार्थी कुशल मनोज पंधराम याने राष्ट्रीय अबॅकस ऑलिम्पियाड स्पर्धेत देशभरातील हजारो विद्यार्थ्यांमध्ये उल्लेखनीय कामगिरी करत राष्ट्रीय स्तरावर ९वा क्रमांक पटकावून शाळा, पालक आणि संपूर्ण गडचिरोली जिल्ह्याचे नाव उंचावले आहे.
गडचिरोली : अमरावती येथे झालेल्या राष्ट्रीय अबॅकस ऑलिम्पियाड स्पर्धेत कुशलने अवघ्या ४८८ सेकंदांत १०० प्रश्न सोडवत १०० पैकी ९९ गुण मिळवले. वेग, अचूकता, स्मरणशक्ती आणि मानसिक गणितातील त्याच्या असामान्य क्षमतेमुळे त्याने राष्ट्रीय स्तरावर मानाचे स्थान मिळवले.
विद्यार्थ्यांच्या बौद्धिक क्षमतेला चालना देणारी अबॅकस ऑलिम्पियाड ही देशातील प्रतिष्ठेची स्पर्धा मानली जाते. मानसिक गणित, एकाग्रता, तर्कशक्ती, स्मरणशक्ती आणि निर्णयक्षमतेची कठोर परीक्षा घेणाऱ्या या स्पर्धेत देशभरातील हजारो विद्यार्थी सहभागी होतात. अशा स्पर्धेत ग्रामीण भागातील विद्यार्थ्याने राष्ट्रीय क्रमवारीत स्थान मिळवणे ही केवळ वैयक्तिक कामगिरी नसून संपूर्ण जिल्ह्यासाठी अभिमानाची बाब ठरली आहे.
कुशलच्या या यशामागे त्याची सातत्यपूर्ण मेहनत, पालकांचे प्रोत्साहन आणि स्काय नेट पब्लिक स्कूलची विद्यार्थीकेंद्रित शिक्षणपद्धती यांचा महत्त्वाचा वाटा आहे. शाळेतील प्रत्येक विद्यार्थी हा केवळ परीक्षेपुरता मर्यादित न राहता त्याच्या सुप्त गुणांना वाव मिळावा, यासाठी विविध स्पर्धा, उपक्रम, प्रयोगशील अध्यापन आणि कौशल्यविकास कार्यक्रम सातत्याने राबविले जातात. त्यामुळे या शाळेतील विद्यार्थी विविध शैक्षणिक, बौद्धिक आणि स्पर्धात्मक परीक्षांमध्ये सातत्याने उल्लेखनीय यश मिळवत आहेत.
शाळेचे संस्थापक आणि शिक्षकवर्ग यांचा आधुनिक व सकारात्मक दृष्टिकोन, विद्यार्थ्यांशी असलेले स्नेहपूर्ण नाते, प्रेरणादायी शैक्षणिक वातावरण आणि नवकल्पनांवर आधारित अध्यापन हीच या यशामागील खरी ताकद असल्याचे पुन्हा अधोरेखित झाले आहे. शाळेचा प्रत्येक उपक्रम विद्यार्थ्यांमधील आत्मविश्वास, नेतृत्वगुण आणि स्पर्धात्मकता विकसित करणारा असल्यामुळे स्काय नेट पब्लिक स्कूलने अल्पावधीतच वेगळी ओळख निर्माण केली आहे.
कुशलच्या या यशाबद्दल शाळेत आयोजित सकाळच्या प्रार्थना सभेत त्याचा पुष्पगुच्छ, पदक आणि प्रमाणपत्र देऊन गौरव करण्यात आला. यावेळी शाळेचे व्यवस्थापन, मुख्याध्यापक, शिक्षक, कर्मचारी तसेच विद्यार्थ्यांनी टाळ्यांच्या गजरात त्याचे अभिनंदन केले. त्याच्या उज्ज्वल भविष्यासाठी शुभेच्छा देताना, ही कामगिरी इतर विद्यार्थ्यांसाठी प्रेरणादायी ठरेल, असा विश्वास व्यक्त करण्यात आला..