लोकस्पर्श न्यूज नेटवर्क
गडचिरोली : गडचिरोलीहून उमरखेडकडे निघालेल्या महाराष्ट्र राज्य परिवहन महामंडळाच्या (एसटी) बसला आज सकाळी मुरखला गावाजवळ भीषण अपघात झाला. भरधाव वेगातील बस अचानक चालकाचे नियंत्रण सुटल्याने रस्त्याच्या खाली उतरली. या दुर्घटनेत अनेक प्रवासी जखमी झाले असल्याची प्राथमिक माहिती समोर आली आहे.
अपघात होताच घटनास्थळी एकच आरडाओरड आणि गोंधळ उडाला. बसमध्ये मोठ्या संख्येने प्रवासी प्रवास करत असल्याने काही काळ भीतीचे वातावरण निर्माण झाले होते. स्थानिक नागरिकांनी तत्काळ घटनास्थळी धाव घेत जखमी प्रवाशांना बसमधून बाहेर काढण्यास मदत केली. माहिती मिळताच पोलिस प्रशासन आणि आपत्कालीन यंत्रणाही घटनास्थळी दाखल झाल्या.
जखमींना तातडीने जवळच्या रुग्णालयात उपचारासाठी हलविण्यात आले असून काही प्रवाशांवर अतिदक्षता विभागात उपचार सुरू असल्याचे समजते. अपघातामुळे काही काळ या मार्गावरील वाहतूक विस्कळीत झाली होती.
दरम्यान, बस नेमकी कशामुळे अनियंत्रित झाली याचे कारण अद्याप स्पष्ट झालेले नाही. तांत्रिक बिघाड, चालकाचा ताबा सुटणे किंवा रस्त्याची परिस्थिती याबाबत विविध शक्यता व्यक्त केल्या जात आहेत. पोलिस आणि परिवहन विभागाने घटनेचा पंचनामा करून सखोल चौकशी सुरू केली आहे.
या दुर्घटनेमुळे परिसरात हळहळ व्यक्त होत असून प्रवाशांच्या सुरक्षेचा प्रश्न पुन्हा ऐरणीवर आला आहे.