‘विनोबा भावे पुरस्काराने ’लक्ष्मण रत्नम यांचा गौरव..

लोकस्पर्श न्यूज नेटवर्क

गडचिरोली : ज्ञानार्जनाच्या प्रवासात शिक्षक केवळ अभ्यासक्रम शिकवणारे मार्गदर्शक नसून विद्यार्थ्यांच्या आयुष्याला नवी दिशा देणारे प्रेरणास्थान असतात, याचे जिवंत उदाहरण म्हणजे जि.प.उच्च प्राथमिक शाळा, येल्ला (ता. मुलचेरा) येथील उपक्रमशील शिक्षक लक्ष्मण रत्नम. अध्यापनातील नावीन्य, खेळांमधून शिक्षण, विद्यार्थ्यांच्या सर्वांगीण विकासासाठी सातत्याने केलेले प्रयोग आणि ग्रामीण भागातील शाळेलाही उत्कृष्टतेच्या शिखरावर नेण्याचा त्यांचा ध्यास—या सर्वांचा सन्मान म्हणून त्यांना प्रतिष्ठेचा ‘आचार्य विनोबा भावे पुरस्कार’ प्रदान करण्यात आला.

जिल्हा परिषद गडचिरोली आणि ओपन लिंक्स फाऊंडेशन यांच्या सामंजस्य करारातून राबविण्यात येणाऱ्या ‘आचार्य विनोबा भावे शिक्षक सहाय्यक कार्यक्रम’—विनोबा (बा) ॲप—माध्यमातून दरमहा जिल्ह्यातील उल्लेखनीय शिक्षकांचा गौरव केला जातो. ऑगस्ट २०२५ महिन्यासाठी निवड झालेल्या ‘पोस्ट ऑफ द मंथ’ विजेते म्हणून लक्ष्मण रत्नम यांना २४ सप्टेंबर २०२५ रोजी हा सन्मान बहाल करण्यात आला.

व्हॉट्सअॅप ग्रुप ही लिंक वापरून जॉइन करा

गटशिक्षणाधिकारी धनंजय कांबळे यांच्या हस्ते पुरस्कार प्रदान करण्यात आला. यावेळी विनोबा कार्यक्रमाचे जिल्हा समन्वयक चंदन रापर्तीवार, तसेच वि.सा.व्य. अमर पालारपवार यांची उपस्थिती होती.

लक्ष्मण रत्नम यांनी गेल्या काही वर्षांत गावातील मुलांना खेळ, प्रयोगशील शिक्षण आणि आनंददायी अध्यापन पद्धतीने ज्ञानाच्या नव्या क्षितिजाकडे नेले. अभ्यासक्रमाबरोबर विज्ञानप्रयोग, सांस्कृतिक कार्यक्रम, मैदानी शिक्षण, स्थानिक इतिहास यांचा सुंदर मेळ घालून त्यांनी मुलांमध्ये सर्जनशीलतेची जाणीव जागवली. मर्यादित साधनसंपत्ती असूनही तंत्रज्ञानाचा प्रभावी वापर, पालक–शाळा संवादाची पद्धत, आणि प्रत्येक विद्यार्थ्याला वैयक्तिक लक्ष देणे हे त्यांचे वेगळेपण ठरले.

टेलिग्राम बातम्यांसाठी लिंक क्लिक करा