सुरजागडच्या ठाकूर देवाच्या चरणी नतमस्तक : आदिवासी श्रद्धा, परंपरा आणि पर्यावरणपूरक विकासाचा संदेश

लोकस्पर्श न्यूज नेटवर्क 

एटापल्ली : सुरजागड परिसरातील आदिवासी समाजाचे आराध्य दैवत असलेल्या ठाकूर देवाचे विधिवत पूजन व दर्शन माजी राज्यमंत्री राजे अम्ब्रीशराव महाराज यांनी करून आदिवासी श्रद्धा, सांस्कृतिक परंपरा आणि लोकभावनांचा सन्मान केला. पारंपरिक धार्मिक विधी व आदिवासी रितीरिवाजांनुसार हे पूजन पार पडले असून, संपूर्ण परिसर भक्तिमय वातावरणाने भारावून गेला होता.

ठाकूर देव हे केवळ एक धार्मिक स्थळ नसून, आदिवासी अस्मितेचे, संस्कृतीचे आणि निसर्गाशी असलेल्या नात्याचे प्रतीक आहे. या पूजनाच्या निमित्ताने आदिवासी समाजाच्या जीवनपद्धतीतील श्रद्धा, सामूहिकता आणि निसर्गपूजेची परंपरा पुन्हा अधोरेखित झाली. स्थानिक पुजारी, ग्रामस्थ व आदिवासी बांधव मोठ्या संख्येने उपस्थित राहून या सोहळ्याचे साक्षीदार झाले.

व्हॉट्सअॅप ग्रुप ही लिंक वापरून जॉइन करा

पूजनावेळी राजे अम्ब्रीशराव महाराज यांनी ठाकूर देवाच्या चरणी नारळ व फुले अर्पण करून परिसरातील जनतेच्या सुख-समृद्धी, शांतता आणि सर्वांगीण विकासासाठी प्रार्थना केली. सुरजागड परिसर हा गेल्या काही वर्षांपासून विकास, खनिज संपत्ती आणि पर्यावरण यांमधील संघर्षामुळे चर्चेत असताना, ठाकूर देवाच्या पूजनातून व्यक्त झालेली ही भावना विशेष अर्थपूर्ण ठरते.

दर्शनानंतर त्यांनी स्थानिक नागरिकांशी संवाद साधत आदिवासी समाजाच्या प्रश्नांवर चर्चा केली. आदिवासी संस्कृती, परंपरा आणि हक्क जपण्याची गरज अधोरेखित करताना, सुरजागडसारख्या संवेदनशील परिसरातील विकास हा पर्यावरणपूरक, स्थानिकांच्या हिताला पूरक आणि सांस्कृतिक मूल्यांना धक्का न लावणारा असावा, असे स्पष्ट मत त्यांनी मांडले. हा संदेश केवळ धार्मिक चौकटीत मर्यादित न राहता, विकासाच्या व्यापक चर्चेशी जोडणारा ठरतो.

टेलिग्राम बातम्यांसाठी लिंक क्लिक करा

यावेळी सुरजागड ग्रामसभा इलाखा अध्यक्ष कल्पनाताई आलाम यांच्यासह राजू पुंगाटी, अनिल कुर्लीवार, शामराव दोरपेटी, मोहन नामेवार, मंगू दोरपेटी, रेन्द्र येमला, राजू मुडमा, प्रशांतभाऊ आत्राम, बाबला मुजुमदार, प्रसाद पुल्लूरवार, येवलं पुलके, संपत पेंडाकुलवार, अनिकेत मामीडवार, अविष्कार गड्डामवार यांच्यासह तालुक्यातील इलाखा प्रमुख, कार्यकर्ते व पदाधिकारी मोठ्या संख्येने उपस्थित होते.