गडचिरोलीत पुन्हा भाजपला दुसरा धक्का — (अजित पवार गटात) महामंत्री गीता हिंगेंचाही पक्षप्रवेश

लोकस्पर्श न्यूज नेटवर्क

गडचिरोलीत दि,२६ : नगरपालिका निवडणुकीच्या तोंडावर पक्षांतरांची मालिका प्रचंड वेगाने घडत असून भाजपला सलग दुसरा मोठा धक्का बसला आहे. जिल्हा महामंत्री गीता हिंगे यांनी पक्षाला रामराम ठोकत राष्ट्रवादी काँग्रेसच्या अजित पवार गटात प्रवेश केला आहे. काही दिवसांपूर्वीच माजी जिल्हा परिषद अध्यक्ष तथा भाजप उपाध्यक्ष रवींद्र ओल्लालवार यांनी सत्तापक्षाचा निरोप घेतला होता. या पार्श्वभूमीवर अजित पवार गटाने भाजप आणि काँग्रेस दोघांनाही अडचणीत आणणारी राजकीय ‘सर्जिकल स्ट्राईक’ केल्याचे चित्र उभे राहिले आहे.

निवडणुकीस अवघे सहा दिवस बाकी असताना निर्माण झालेली ही परिस्थिती जिल्ह्यातील संपूर्ण राजकीय समीकरणे हलवून सोडणारी ठरली आहे. भाजप आणि काँग्रेस दोन्ही पक्ष स्वबळावर लढण्याच्या तयारीत असताना तृतीयपंथीय शक्ती म्हणून अजित पवार गटाने अचानक जनाधार वाढवण्याचा ‘साइलेंट पण प्रभावी’ मोर्चा उघडला आहे. गीता हिंगे या नगराध्यक्ष पदासाठी संधी न मिळाल्याने नाराज होत्या. अखेर तक्रारींची दखल न घेतल्याने त्यांनी भाजपला रामराम ठोकून राष्ट्रवादीच्या अजित पवार गटाचा हात धरला. अहेरीचे आमदार धर्मरावबाबा आत्राम आणि जिल्हाध्यक्ष रवींद्र वासेकर यांच्या उपस्थितीत प्रवेश सोहळा संपन्न झाला.

व्हॉट्सअॅप ग्रुप ही लिंक वापरून जॉइन करा

देसाईगंज आणि आरमोरी भागात काँग्रेस व भाजपच्या प्रमुख नेत्यांनी काही दिवसांपूर्वीच अजित पवार गटात दाखल होऊन स्थानिक पातळीवर नव्या शक्तिसंतुलनाची निर्मिती केली आहे. त्यामुळे या गटात होत असलेला ‘नेतृत्व ओघ’ हा केवळ व्यक्तिशी संबंधित निर्णय नसून आगामी राजकीय शक्तींचा स्पष्ट संकेत असल्याचे जाणकारांचे मत आहे. विशेष म्हणजे तिन्ही नगरपालिकांमध्ये अजित पवार गटाने अनपेक्षित ताकदीने मोर्चेबांधणी केली आहे. त्यामुळे पारंपरिक मतदानफाटे तुटून भाजपच्या गडावर थेट परिणाम होण्याची स्थिती निर्माण झाली आहे.

दरम्यान भाजपासाठी आणखी एक धक्का म्हणजे देसाईगंजच्या माजी नगराध्यक्षा शालु दंडवते यांनी बुधवारी पक्षाला सोडचिट्ठी देत आमदार विजय वडेट्टीवार यांच्या उपस्थितीत काँग्रेसचा झेंडा हाती घेतला. भाजपमध्ये वाढत्या नाराजीची झळ जिल्ह्यात प्रकर्षाने जाणवत असून दोन दिवसांत दोन वरिष्ठ नेत्यांची एक्झिट ही भाजपच्या अंतर्गत राजकारणातील ताणतणावाची जाहीर साक्ष बनली आहे.

टेलिग्राम बातम्यांसाठी लिंक क्लिक करा

जिल्ह्यातील तिन्ही नगरपालिकांच्या निवडणुका अत्यंत चुरशीच्या असून सर्वच पक्षांनी प्रचारयुद्धाचा धडाका लावला आहे. कॉर्नर सभा, घरभेटी, सोशल मीडिया आणि स्थानिक संघटनांचे पाठबळ मिळवण्याचे प्रयत्न या सर्व गोष्टींनी वातावरण तापले आहे. या पार्श्वभूमीवर भाजपसमोर गड टिकवण्याचे गंभीर आव्हान उभे राहिले आहे. दुसरीकडे अजित पवार गटाच्या आक्रमक मोर्चेबांधणीमुळे बहुकोणी स्पर्धा रंगतदार बनली असून राजकारणातील प्रत्येक हालचाल जिल्ह्याच्या निकालाचे भविष्य ठरवू शकते, अशी परिस्थिती निर्माण झाली आहे.