बॅनरच्या माध्यमातून दारूमुक्त निवडणुकीचे आवाहन

गडचिरोली : गडचिरोली जिल्ह्यातील तिन्ही विधानसभा क्षेत्रात होऊ घातलेली निवडणूक ही दारूमुक्त व्हावी, यासाठी जिल्हा प्रशासनाच्या स्वीप कार्यक्रमाअंतर्गत मुक्तिपथ-शक्तीपथ संघटनेच्या माध्यमातून जिल्हाभरातील शहरी तसेच ग्रामीण भागामध्ये बॅनर व पत्रकांतुन ही विधानसभा निवडणूक दारूमुक्त करण्याचे आवाहन केले जात आहे.

मागील ३१ वर्षापासून गडचिरोली जिल्ह्यात  दारूबंदी कायम स्वरूपी टिकून आहे. दारूबंदीचे समर्थन करणारा उमेदवार असल्यास गावाची किंबहुना जिल्हयाची दारूबंदी टिकून राहते,  मजबूत होते. मतदानाच्या काळात दारू नसेल तर भांडणे शक्यतो होत नाही, शांततेच्या वातावरणात मतदान प्रक्रिया पार पडते. विकासासाठी निवडून दिलेल्या उमेदवाराला जाब विचारता येतो. त्यामुळे उमेदवारांकडून दारूचे वाटप होऊ नये यासाठी मुक्तिपथ-शक्तीपथ गाव संघटनेच्या माध्यमातून गावागावांमध्ये ठराव घेऊन आपला उमेदवार कसा असावा, मतदारांचे कर्तव्य आदी बाबी पटवून दिले जात आहेत. आतापर्यंत जिल्हाभरातून २७२ गावांमध्ये ठराव पारित करण्यात आले असून एकूण  १५२२३ लोकांनी स्वाक्षरी करीत दारूमुक्त निवडणूक पार पाडण्याचा निर्णय घेतला आहे. तसेच विविध ठिकाणी बॅनर लावून जागृती केली जात आहे.

जो पाजील माझ्या नवऱ्याला दारू त्या उमेदवाराला नक्कीच पाडू, दोन पैशाची दारू घेऊन आपले अमूल्य मत देऊ नका, ज्याला दारूबंदी नको, तो उमेदवार आम्हाला नको, असे आशय लिहिलेल्या बॅनरतुन जागृती करून ही निवडणूक दारूमुक्त करण्याचे लोकांना आवाहन केले जात आहे. तसेच निवडणुकीसाठी उभा राहणारा उमेदवार गाव व जिल्हा दारूबंदीचा समर्थन करणारा असावा. आमचे मत हवे असल्यास दारूबंदी समर्थनाचे लिखित वचन निवडणुकीत उभे असणार्‍या उमेदवाराने आम्हाला द्यावे लागेल. वचन न देणार्‍या नेत्याला, उमेदवाराला आम्ही मत देणार नाही. स्वतः दारू पिणारा नसावा, निवडणुकीच्या पुर्व काळात व निवडणुकीच्या दिवशी दारू वाटप करू नये. निवडणूक शांततेत पार पाडावी, जो दारू वाटप करेल त्याला आम्ही मत देणार नाही. दारूच्या नशेत मतदान करून अयोग्य उमेदवार निवडला जाऊ नये, याची काळजी सर्वांनी घेतली पाहिजे. इत्यादि विविध मुद्दे चर्चा करून गावागावात दारूमुक्त निवडणुकीचे ठराव घेतले जात आहेत.