अहेरीत कावीळचा उद्रेक — एकाच प्रभागात ४८ रुग्ण

लोकस्पर्श न्यूज नेटवर्क

अहेरी (गडचिरोली) : अहेरी नगरपंचायतीतील प्रभाग क्रमांक १४ मध्ये कावीळच्या रुग्णांची अचानक वाढ होत ४८ प्रकरणे समोर आल्यानंतर आरोग्य विभागामध्ये खळबळ उडाली असून संपूर्ण यंत्रणा तातडीने अॅक्शन मोडमध्ये गेली आहे. तब्बल १२ विशेष आरोग्य पथकांच्या माध्यमातून घराघरांत जाऊन रुग्ण शोधमोहीम, तपासणी आणि जनजागृती सुरू करण्यात आली आहे.

१८ नोव्हेंबरपासून काही मुलांची प्रकृती बिघडू लागल्याने पालकांनी खाजगी आणि शासकीय रुग्णालयात उपचार सुरू केले. तीन-चार रुग्णांवर उपचार सुरू असतानाच पुढील काही दिवसांत ही संख्या झपाट्याने वाढत ४८ वर पोहोचली. आरोग्य विभागाला परिस्थितीची माहिती मिळेपर्यंत प्रभागात संसर्गाचा फैलाव मोठ्या प्रमाणात झाल्याचे चित्र स्पष्ट झाले.

व्हॉट्सअॅप ग्रुप ही लिंक वापरून जॉइन करा

२७ नोव्हेंबर रोजी जिल्हा सर्वेक्षण अधिकारी डॉ. पंकज हेमके, तालुका आरोग्य अधिकारी डॉ. किरण वानखेडे आणि डॉ. विशाल येरावार यांनी परिसरात भेट देऊन प्राथमिक तपासणी केली. तब्बल ४० संशयित रुग्णांचे रक्तनमुने घेऊन प्रयोगशाळेला पाठविण्यात आले. त्यानंतर १२ पथकांच्या साहाय्याने सर्व घरांची दवाखाना-पातळीवरील तपासणी, लक्षणांची चौकशी आणि स्वच्छतेविषयी मार्गदर्शनाची मोहीम सुरू करण्यात आली.

तालुका आरोग्य अधिकारी डॉ. किरण वानखेडे यांनी सांगितले की, “माहिती मिळताच आम्ही तातडीने पथकांसह प्रत्यक्ष भेटी सुरू केल्या आहेत. संशयित रुग्णांचे नमुने घेतले जात आहेत. उपचार सुरू असून संपूर्ण यंत्रणा सतर्क आहे. नगरपंचायत व जीवन प्राधिकरण विभागाला आवश्यक निर्देश दिले आहेत. विद्यार्थ्यांचीही आरोग्य तपासणी केली जाणार आहे.”

टेलिग्राम बातम्यांसाठी लिंक क्लिक करा

दरम्यान, या प्रभागात नेहमीच पिण्याच्या पाण्याचा तुटवडा, नालीसफाईचा अभाव आणि दूषित पाण्याची तक्रार कायम असल्याची नागरिकांची नाराजी उफाळून आली आहे. डॉक्टरांकडून सूचना मिळताच नगरपंचायत प्रशासनाने शुक्रवारी नाल्या साफ करण्याचे काम सुरू केले, तसेच टँकरद्वारे तात्पुरता पिण्याच्या पाण्याचा पुरवठा वाढविल्याचे आढळले.

जीवन प्राधिकरणाच्या पाणीपुरवठा पाइपलाइनमध्ये काही ठिकाणी लिकेज असल्यामुळे दूषित पाण्याचा पुरवठा होत असल्याची शक्यता आरोग्य विभागाने व्यक्त केली आहे. यानुसार संबंधित विभागाने तातडीने खोदकाम आणि दुरुस्तीची प्रक्रिया सुरू केली आहे. पिण्याच्या पाण्यातील प्रदूषणामुळेच कावीळचा संसर्ग पसरल्याचा प्राथमिक अंदाज वर्तवला जात असून, या प्रभागातील पाणीव्यवस्था नेहमीच ढासळलेली असल्याचा नागरिकांचा रोष वाढत आहे.

एकीकडे तातडीचे उपचार आणि तपासणी सुरू असतानाच दुसरीकडे नागरिकांमध्ये भीतीचे वातावरण निर्माण झाले असून, “पाण्याची बिकट समस्या आणि ढिसाळ स्वच्छता व्यवस्थेमुळे ही परिस्थिती थेट जीवावर येणार नाही ना?” असा प्रश्न स्थानिक पातळीवर आज जोरकसपणे उपस्थित केला जात आहे.