Get real time updates directly on you device, subscribe now.
लोकस्पर्श न्यूज नेटवर्क
गडचिरोली, ३० : नगरपरिषद निवडणुकीच्या पार्श्वभूमीवर आयोजित विकाससभेत मुख्यमंत्री देवेंद्र फडणवीस यांनी गडचिरोलीचे रूपांतर आधुनिक, नियोजनबद्ध आणि स्मार्ट शहरात करण्याचा संकल्प जाहीर केला. “सत्ता दिल्यास गडचिरोलीला स्मार्ट सिटीचा दर्जा देत दक्षिण भारताचे प्रवेशद्वार बनवू,” असे आश्वासन त्यांनी नागरिकांना दिले.
फडणवीस म्हणाले की, मागील कार्यकाळात जिल्ह्यात अंदाजे आठशे कोटी रुपयांची विकासकामे झाली असून, आता शहरासाठी सर्वसमावेशक आराखडा तयार करण्यात आला आहे. यामध्ये १३० कोटींच्या वाढीव पाणीपुरवठा योजनेला मान्यता, अतिक्रमणांचे नियमितीकरण, प्रत्येक कुटुंबाला घरबांधणीचा हक्क, तसेच वाहतुकीसाठी आऊटर रिंगरोडची उभारणी अशा प्रमुख प्रकल्पांचा समावेश आहे. गडचिरोली विमानतळ प्रकल्पाबाबतही लवकरच प्रत्यक्ष काम सुरू करण्याचे संकेत त्यांनी दिले.
व्हॉट्सअॅप ग्रुप ही लिंक वापरून जॉइन करा
औद्योगिक गुंतवणुकीबाबत बोलताना त्यांनी स्पष्ट केले की, जिल्ह्यात तीन लाख कोटी रुपयांची इन्व्हेस्टमेंट येत असून, त्यातून निर्माण होणारा रोजगार स्थानिक युवकांनाच प्राधान्याने दिला जाणार आहे. “विकास आणि पर्यावरण दोन्ही हातात हात घालून पुढे नेऊ. जल, जंगल आणि जमिनीचा सन्मान राखूनच प्रकल्प राबवणार आहोत,” असे ते म्हणाले.
आरोग्य व शिक्षण क्षेत्रातील सुधारणा हाही त्यांच्या भाषणाचा केंद्रबिंदू ठरला. सुपर-स्पेशालिटी सुविधांचा विस्तार, महात्मा फुले जनआरोग्य योजनेत ३५ लाख रुपयांपर्यंत मोफत उपचार, तसेच माइनिंग तंत्रविद्या आणि उच्च शिक्षणाच्या नवनवीन संधी उपलब्ध करून देण्याबाबत त्यांनी आश्वासन दिले.
टेलिग्राम बातम्यांसाठी लिंक क्लिक करा
महिला सक्षमीकरणाबाबतही त्यांनी ठाम भूमिका मांडली. “लाडकी बहिणी योजना बंद होणार नाही. त्यापुढे ‘लखपती दीदी’ प्रकल्पाद्वारे महिलांना आर्थिक स्वावलंबनाचा नवा अध्याय दिला जाईल,” असे त्यांनी स्पष्ट केले.
सभेच्या शेवटी मुख्यमंत्री फडणवीस म्हणाले, “टीका न करता केवळ कामाचा हिशेब मांडण्यासाठी आलो आहे. जनता साथ देईल तर गडचिरोली पुढील पंचवीस वर्षांचा विकासमार्ग स्वतः ठरवेल. तुमचा निर्णय हे शहर महाराष्ट्रातील आदर्श आधुनिक केंद्र बनवू शकतो.”
सभेला माजी खासदार अशोक नेते, आमदार कीर्तीकुमार भांगडिया, माजी आमदार डॉ. देवराव होळी, डॉ. नामदेव उसेंडी, किशन नागदेवे, प्रशांत वाघरे यांसह भाजपचे प्रमुख पदाधिकारी व नगराध्यक्ष पदाचे उमेदवार उपस्थित होते.