आरमोरीतील नगर परिषद निवडणूक — मतमोजणी केंद्र बदलावे; नागरिकसुरक्षेचा गंभीर प्रश्न उभारत सामाजिक कार्यकर्ते श्रीनिवास आंबटवार यांची ठाम मागणी

लोकस्पर्श न्यूज नेटवर्क

रवि मंडावार,

गडचिरोली : आरमोरी येथील नगर परिषदच्या लोकशाहीच्या सणाला अवघे काही दिवस शिल्लक असताना, आरमोरी नगर परिषद निवडणुकीतील मतमोजणीचे ठिकाण हा वादग्रस्त मुद्दा ठरत असून, नागरिकांच्या सुरक्षिततेशी थेट संबंधित असलेला हा प्रश्न आता प्रशासकीय प्रामाणिकतेची मोठी कसोटी ठरत आहे. मतमोजणी तालुका पशुचिकित्सालयाच्या शासकीय इमारतीत घेण्याचा निर्णय एकीकडे निवडणूक तयारी दर्शवत असला, तरी दुसरीकडे ही जागा निवडण्यात प्रशासनाने दाखवलेले दुर्लक्ष आणि संवेदनशीलतेचा अभाव गंभीरपणे खटकणारा आहे, अशी तीव्र टीका सामाजिक कार्यकर्ते श्रीनिवास आंबटवार यांनी केली आहे.

व्हॉट्सअॅप ग्रुप ही लिंक वापरून जॉइन करा

आंबटवार यांनी निवेदनात स्पष्ट केले की मतमोजणीच्या दिवशी जनतेची प्रचंड गर्दी ओसंडून वाहते. अशा वेळी निवडणूक परिणाम जाहीर होणाऱ्या परिसराला लागूनच उपजिल्हा रुग्णालय, रुग्णवाहिका, आपत्कालीन सेवा, धावत्या तासांत वर्दळ असलेला राष्ट्रीय महामार्ग, तसेच घनदाट लोकवस्ती असणे ही स्वतःतच गंभीर सुरक्षा तडजोड आहे. निवडणूक निकालाच्या गदारोळात रुग्णालयात येणाऱ्या जीवघेण्या परिस्थितीतील रुग्णांना होणारा अडथळा प्रशासनाला दिसत नाही का, असा जळजळीत सवालही त्यांनी उपस्थित केला.

इतकेच नव्हे, तर स्थानिक स्वराज्य संस्थेच्या निकालासाठी ही जागा इतिहासात कधीच वापरलेली नाही, हे विशेष अधोरेखित करत “पूर्वानुभवाकडे पाठ फिरवून घेतलेला हा निर्णय प्रशासनाच्या सुजाणतेवर प्रश्नचिन्ह उभे करतो,” असे आंबटवार म्हणाले.

टेलिग्राम बातम्यांसाठी लिंक क्लिक करा

त्यांच्या मते तहसील कार्यालय किंवा आयटीआयची जुनी शासकीय इमारत ही मतमोजणीसाठी अधिक सुरक्षित, मोकळी, संरचनात्मकदृष्ट्या सक्षम आणि नागरिकांच्या व्यवस्थापनास योग्य ठिकाणे आहेत. अशा पर्यायांची उपलब्धता असताना, पशुचिकित्सालयाच्या इमारतीसारख्या प्रतिबंधित व संवेदनशील परिसराची निवड करणे म्हणजे विवेकाचा घोर अभावच ठरतो.

जनतेच्या मनातील अस्वस्थता शब्दांत व्यक्त करत त्यांनी इशारा दिला की मतमोजणीच्या दिवशी गोंधळ, वाहतूक कोंडी, मार्ग अवरोध, सामाजिक अशांतता किंवा सुरक्षाभंगाचे कोणतेही रूप दिसल्यास त्याची नैतिक जबाबदारी ही निर्णय घेणाऱ्या अधिकाऱ्यांवर राहील.

आंबटवार यांच्या या ठाम मागणीला आरमोरीतील नागरिकांचाही उत्स्फूर्त पाठिंबा मिळत आहे. कारण प्रश्न केवळ मतमोजणीचा नाही, तर लोकशाहीच्या सणात जनतेला सुरक्षित, सन्मानपूर्वक आणि सुव्यवस्थित वातावरण देण्याचा आहे.

मतमोजणी केंद्राबाबतचा निर्णय प्रशासनाच्या टेबलावर असला तरी, आंबटवार यांनी उठवलेल्या या प्रश्नाने निवडणूक व्यवस्थेमधील दूरदृष्टि, जबाबदारी आणि लोककल्याणाचा पाया किती भक्कम आहे, याची कसोटी आता अपरिहार्यपणे समोर आली आहे.