संविधान मूल्ये कृतीत उतरविण्याची गरज : डॉ. पुरणचंद्र मेश्राम

लोकस्पर्श न्यूज नेटवर्क,

 

गडचिरोली, दि. २६ नोव्हेंबर : “भारतीय संविधानातील मूल्ये ही केवळ पुस्तकात वाचण्याची गोष्ट नसून ती प्रत्येक नागरिकाने आपल्या जीवनातील वर्तनात प्रामाणिकपणे उतरविणे गरजेचे आहे,” असे प्रतिपादन राष्ट्रसंत तुकडोजी महाराज नागपूर विद्यापीठाचे माजी कुलसचिव डॉ. पुरणचंद्र मेश्राम यांनी केले. गोंडवाना विद्यापीठातील डॉ. बाबासाहेब आंबेडकर अध्यासन केंद्रातर्फे संविधान दिनानिमित्त आयोजित ‘भारतीय संविधान : राष्ट्र उभारणीचा पाया’ या व्याख्यानात ते बोलत होते.

भारतीय संविधान स्वीकारास ७६ वर्षे पूर्ण झाल्याच्या निमित्ताने, गोंडवाना विद्यापीठातील डॉ. बाबासाहेब आंबेडकर अध्यासन केंद्रातर्फे “भारतीय संविधान : राष्ट्र उभारणीचा पाया” या विषयावर व्याख्यानाचे आयोजन विद्यापीठाच्या नवीन सभागृहात करण्यात आले. यावेळी ते प्रमुख वक्ते म्हणून बोलत होते.

कार्यक्रमाच्या अध्यक्षस्थानी कुलगुरू डॉ. प्रशांत बोकारे होते. प्र-कुलगुरू डॉ. श्रीराम कावळे, कुलसचिव डॉ. अनिल हिरेखण, व्यवस्थापन परिषदेचे सदस्य प्रशांत मोहिते, आणि अध्यासन केंद्राचे प्रमुख डॉ. दिलीप बारसागडे मान्यवर म्हणून उपस्थित होते. समारंभाची सुरुवात डॉ. बाबासाहेब आंबेडकर यांच्या प्रतिमेस मान्यवरांच्या हस्ते माल्यार्पणाने झाली. त्यानंतर कुलगुरू डॉ. बोकारे यांच्या नेतृत्वाखाली भारतीय संविधानाच्या प्रास्ताविकेचे सामूहिक वाचन करण्यात आले.

अध्यक्षीय भाषणात डॉ. बोकारे म्हणाले, “संविधानाचे स्मरण करणे ही औपचारिकता नाही; ते आपल्या कृतीत उतरविणे ही आपण सर्वांची जबाबदारी आहे. पुढील संविधान दिनी आपण आपल्या आयुष्यात संविधान किती जगलो याचा स्वमूल्यांकन करायला हवे.”

कार्यक्रमात ‘संविधान गीत’ आस्थापना विभागातील लघुलेखक प्रशांत पुनवटकर यांनी सादर केले.वक्त्यांचा परिचय जनसंवाद विभागातील विद्यार्थिनी पल्लवी फुकट यांनी करून दिला.प्रस्तावना डॉ. बारसागडे यांनी तर कार्यक्रमाचे संचालन मराठी विभागाचे सह-प्राध्यापक प्रा. निळकंठ नरवाडे यांनी केले.आभार प्रदर्शन कुलसचिव डॉ. अनिल हिरेखण यांनी मानले.

कार्यक्रमाच्या यशस्वीतेसाठी अध्यासन केंद्राचे सह-समन्वयक रोहित कांबळे यांनी परिश्रम घेतले.विद्यार्थी, अध्यापक आणि शिक्षकेतर कर्मचारी मोठ्या संख्येने उपस्थित राहिल्याने कार्यक्रमाला उत्स्फूर्त प्रतिसाद मिळाला.

हे देखील वाचा,

गडचिरोलीतील तिन्ही पालिका निवडणुका ‘स्टे’च्या उंबरठ्यावर — आरक्षणाचा स्फोट, उमेदवारांची झोप उडाली

३ किमीचा रस्ता ‘ठप्प’; अहेरी–प्राणहिता मार्ग प्रशासनाच्या दिरंगाईचा राष्ट्रीय नमुना

३ किमीचा रस्ता ‘ठप्प’; अहेरी–प्राणहिता मार्ग प्रशासनाच्या दिरंगाईचा राष्ट्रीय नमुना