पारंपरिक गटई ठेले नव्हे, आधुनिक रोजगार साधने द्या– डॉ. मिलिंद नरोटे यांना समता संघर्ष संघटनेचे निवेदन

लोकस्पर्श न्यूज नेटवर्क

गडचिरोली : अनुसूचित जातीतील युवकांना स्वावलंबनासाठी पारंपरिक गटई ठेले न देता बदलत्या काळानुसार आधुनिक व्यवसाय साधनांची सुविधा शासनाने द्यावी, अशी मागणी समता संघर्ष समाजपरिवर्तन संघटनेतर्फे करण्यात आली आहे. या संदर्भातील निवेदन ३० ऑगस्ट रोजी विधीमान्य आमदार डॉ. मिलिंद नरोटे यांना देण्यात आले.

निवेदनात नमूद करण्यात आले आहे की, आजच्या स्पर्धात्मक युगात पारंपरिक गटई ठेले व तत्सम योजना समाजाच्या आर्थिक प्रगतीस अपुऱ्या आहेत. युवकांना स्थिर उत्पन्न आणि रोजगारक्षम संधी उपलब्ध व्हाव्यात यासाठी शासनाने ऑटो-रिक्षा, पिकअप, मेटाडोर, कार यांसारखी आधुनिक साधने १०० टक्के अनुदानातून उपलब्ध करून द्यावीत.

व्हॉट्सअॅप ग्रुप ही लिंक वापरून जॉइन करा

युवकांसाठी कौशल्यविकास कार्यशाळा आयोजित करणे, उद्योजकतेला चालना देण्यासाठी मार्गदर्शन शिबिरे घेणे, तसेच आर्टी/बार्टी योजनांमध्ये विशेष सवलतींचा लाभ देणे या अतिरिक्त मागण्या संघटनेने केल्या आहेत. प्रशिक्षणाच्या कमतरतेमुळे अनेक युवक उद्योग उभारण्यात मागे पडतात, त्यामुळे शासनाने ठोस उपाययोजना करावी, अशी मागणीही निवेदनात व्यक्त करण्यात आली.

निवेदन देताना सामाजिक कार्यकर्ते लक्ष्मण मोहुर्ले, प्रदेश महिला अध्यक्षा मायाताई मोहुर्ले, प्रदेश उपाध्यक्ष विजय देवतळे, सचिव किशोर नरुले, सहसचिव संदीप येनगंटीवार, जिल्हा अध्यक्ष सुनील मोहुर्ले, जिल्हा सचिव योगेश गोरडवार, परमेश्र्वर मोहूर्ले, संजय गोरडवार, प्रमोद रामटेके, संतोष कोपुलवार आदी पदाधिकारी उपस्थित होते.

टेलिग्राम बातम्यांसाठी लिंक क्लिक करा

आधुनिक समाजाच्या जागरूकतेचा आणि बदलत्या परिस्थितीनुसार रोजगाराच्या अपेक्षांचा ठसा उमटला आहे. पारंपरिक योजनांपेक्षा काळाशी सुसंगत आणि स्थैर्य देणाऱ्या योजनांची गरज अधोरेखित करण्यात आली असून, शासनाकडून याबाबत सकारात्मक निर्णयाची अपेक्षा समाजातून व्यक्त होत आहे.

समता संघर्ष समाजपरिवर्तन संघटनेने मांडलेली मागणी योग्य आहे. मादगी समाज हा मागास आणि दुर्बल घटक म्हणून ओळखला जातो. पारंपरिक व्यवसाय कालबाह्य झाले आहेत. आधुनिक रोजगार साधने या समाजाला नितांत गरजेची आहेत. हे निवेदन मी शासनापर्यंत पोहोचवून लवकरच पुढाकार घेईन.

आ. डॉ. मिलिंद नरोटे