दंतेवाड्यात ‘पूना मारगेम’ उपक्रमाचा मोठा प्रभाव ;६५ लाखांच्या इनामासह २७ जणांसह ३७ माओवादी आत्मसमर्पण

लोकस्पर्श न्यूज नेटवर्क

बस्तर: छत्तीसगड शासनाच्या ‘पूना मारगेम’ — पुनर्वसन ते पुनर्जीवन या उपक्रमाला मिळत असलेल्या प्रतिसादाला मोठे यश मिळाले असून, आज ६५ लाखांच्या एकूण २७ इनामी माओवाद्यांसह ३७ जणांनी शस्त्रांचा त्याग करून समाजाच्या मुख्यधारेत परतण्याचा निर्णय घेतला. शांतता प्रस्थापित करणे, पुनर्वसन मजबूत करणे आणि बस्तरमध्ये समावेशक विकास घडवणे या उद्दिष्टाने राज्य शासन, केंद्र सरकार, दंतेवाडा पोलिस, स्थानिक प्रशासन आणि केंद्रीय राखीव पोलिस दल एकत्रितपणे कार्यरत आहेत.

बस्तर परिक्षेत्राचे पोलीस महानिरीक्षक सुन्दरराज पट्टिलिंगम यांनी सांगितले की ‘पूना मारगेम’ हा उपक्रम बस्तरमध्ये स्थायी शांतता, मान-सन्मान आणि विकासासाठी परिवर्तनकारी मॉडेल म्हणून विकसित झाला आहे. याच मॉडेलवर विश्वास ठेवून माओवादी हिंसाकर्म सोडत असल्याचे त्यांनी सांगितले.

व्हॉट्सअॅप ग्रुप ही लिंक वापरून जॉइन करा

आज आत्मसमर्पण करणाऱ्या ३७ माओवाद्यांच्या प्रक्रियेदरम्यान दंतेवाडा रेंजचे उप-महानिरीक्षक कमलोचन कश्यप, सीआरपीएफचे उप-महानिरीक्षक राकेश चौधरी, जिल्हा पोलीस अधीक्षक गौरव राय तसेच १११वी, २३० वी आणि ८० वी सीआरपीएफ वाहिन्यांचे कमांडंट आणि अतिरिक्त पोलीस अधीक्षक रामकुमार बर्मन उपस्थित होते. आत्मसमर्पणाची संपूर्ण प्रक्रिया डीआरजी कार्यालय, दंतेवाडा येथे पार पडली.

या कारवाईत डीआरजी, बस्तर फायटर्स, विशेष गुप्तवार्ता शाखा आणि सीआरपीएफच्या युनिट्सने विशेष भूमिका निभावली. राज्य शासनाच्या धोरणानुसार आत्मसमर्पित माओवाद्यांना ५०,००० रुपयांची तात्काळ आर्थिक मदत, कौशल्य विकास प्रशिक्षण आणि कृषीभू मीसह विविध पुनर्वसन सुविधा दिल्या जाणार आहेत.

टेलिग्राम बातम्यांसाठी लिंक क्लिक करा

आत्मसमर्पण केलेल्या माओवाद्यांमध्ये ८ ते ५० हजार रुपयांपर्यंत इनाम घोषित असलेल्या २७ जणांचा समावेश असून कंपनीचे सदस्य, एरिया कमिटी सदस्य, मिलिशिया पदाधिकारी, केएएमएस पदाधिकारी अशा विविध स्तरांवर काम करणारे कार्यकर्ते आहेत. त्यापैकी काही माओवादी २०२० मध्ये मिनपा येथे झालेल्या २६जवानांच्या शहादतीची मोठी घटना, २०१९ मधील केशकुतुल परिसरातील हल्ला, तसेच २०२४ मधील गोबेल–थुलथुली जंगलातील चकमक अशा गंभीर घटनांमध्ये सहभागी होते. याशिवाय रोड तोडणे, झाडे तोडणे, बॅनर-पोस्टर लावणे अशा नक्षल क्रियाकलापांमध्येही त्यांचा सहभाग होता.

मागील २० महिन्यांत दंतेवाडा जिल्ह्यात १६५ इनामींसह ५०८ माओवादी आत्मसमर्पण करून मुख्यधारेत परतले आहेत. तर ‘लोन वर्राटू’ अभियानांतर्गत आजपर्यंत ३३३ इनामी, तसेच एकूण ११६० माओवादी शस्त्र सोडून समाजात सामील झाले आहेत. ‘पूना मारगेम’ आणि ‘लोन वर्राटू’ या दोन्ही मोहिमांनी बस्तरमध्ये शांततेच्या प्रक्रियेला लक्षणीय गती दिली आहे.

दंतेवाडा पोलिसांनी सर्व माओवाद्यांना हिंसेपासून दूर राहण्याचे, कुटुंब आणि समाजाच्या हितासाठी शांततेचा मार्ग स्वीकारण्याचे आवाहन केले आहे. शासनाचे पुनर्वसन धोरण संवाद, संधी आणि सन्मान यांवर आधारित असून, माओवाद्यांना नव्याने जीवन उभारण्याची संधी दिली जात राहील, असे प्रशासनाने स्पष्ट केले.