उमेदवारीवरून अजितदादांनी पेटवले रान, मग बाकीच्यांनी काय गोट्या खेळायच्या ?

पूर्वी आमदार झालो त्यावेळी याठिकाणी काय होत व आता काय परिस्थिती आहे, त्यामुळे तुम्ही विचार करून मला साथ द्या, असे आवाहन अजितदादांनी केले. एवढ्या मोठ्या प्रमाणात पहिल्यांदाचा माळेगांवच्या सभेला महिला आल्या आहेत. तुम्हाला पैसे देऊन आणलं का? कारण दोन दिवसापूर्वी पैसे देऊन सभेला आणलं गेलं. असं कधीच आजपर्यंत झालं नव्हतं मात्र ही पद्धत अतिशय चुकीची आहे, माळेगांव मधील काही पुढारी चुकीचं काम करतायत मी तुम्हाला सांगतो तुम्हाला तसं करायच असेल तर उघड करा. अशी नाराजी त्यांनी व्यक्त केली. मी उद्या सभा घेणार आहे. ते पण सभा घेणार आहेत ते त्यांचा विचार मांडतील मी माझा विचार मांडणार आहे पुढच्या पिढी साठी कुणाला साथ द्यायची हे ठरवा, असे आवाहन अजितदादांनी मतदारांना केले.

पवार साहेब रिटायर झालेनंतर  मग बारामतीकडे कोण लक्ष देणार साहेबाचा आदर राखून लोकसभेला  ताईंना साथ दिली. आता मला साथ द्या  मी न मागता सगळं करतोय याची तुम्हाला किंमत कळत नाही  विनंती करणे माझं काम आहे. मतदार म्हणून निर्णय तुमचा आहे, अशी भावनिक साद दादांनी घातली.

दरम्यान शरद पवार यांच्या नवीन नेतृत्व तयार करत असल्याच्या  वक्तव्यावर अजितदादांनी प्रतिक्रिया दिली. पवारांशिवाय दुसर्‍या कुणाला संधी आहे की नाही, असा सवाल त्यांनी केला. शरद पवार यांनी सांगीतलं की तीस वर्षांपासून अजितला संधी दिली. मग बारामतीत पवारांशिवाय दुसरं कोणी नाही का? आयुष्यभर पवारच उभे राहतील का? बाकीच्यांनी काय गोट्या खेळायच्या का? असे अजितदादा म्हणाले. यावरून अखेरच्या टप्प्यात अजितदादांनी मोठं कार्ड खेळल्याचं दिसून येते.