दारूमुक्त निवडणूक व जिल्हा दारूबंदीला समर्थन आरमोरी मतदार संघातील सर्व उमेदवारांनी दिला वचननामा

गडचिरोली : निवडणुकीत मी व माझा पक्ष मते मिळवण्यासाठी दारूचा वापर करणार नाही. मी गडचिरोली जिल्ह्यातील दारूबंदीचे समर्थन करतो, असे वचन, विधानसभा निवडणूकीकरिता उभे असलेल्या उमेदवारांनी दिले आहे. मुक्तिपथच्या आवाहनाला प्रतिसाद देत आरमोरी मतदार संघातील भारतीय जनता पक्षाचे उमेदवार कृष्णा गजबे, भारतीय राष्ट्रीय काँग्रेसचे रामदास मसराम, अपक्ष उमेदवार आनंदराव गेडाम, वंचित बहुजन आघाडीचे मोहनदास पुराम, बहुजन समाज पार्टीचे अनिल केरामी, अपक्ष उमेदवार डॉ. शैलू गंटावर, आझाद समाज पार्टीचे चेतन काटेंगे अपक्ष उमेदवार खेमराज नेवारे या उमेदवारांनी होणारी विधानसभेची निवडणूक दारूमुक्त व्हावी, सोबतच गडचिरोली जिल्ह्याच्या दारूबंदीला आमचे समर्थन आहे, असा वचननामा दिला आहे.

या निवडणुकीत निवडून आल्यास अथवा न आल्यास जिल्ह्यातील दारूबंदीच्या प्रभावी अंमलबजावणी साठी मी पूर्णपणे प्रयत्न करीन, असे वचननाम्यामध्ये या सर्व उमेदवारांनी वचन दिले आहे. विशेष म्हणजे या सर्व  उमेदवारांनी लिखित व रेकोर्डेड पद्धतीने वचननामे दिले आहे. जनतेच्या माहिती साठी व निवडणूकी नंतर या नेत्यांना जाब विचारता यावा यासाठी लिखित वचननामा व रेकोर्डेड व्हिडिओ समाज माध्यमामध्ये प्रकाशित केले आहे. निवडणूक नंतर जनतेला वचन पूर्तीचा हिशोब या नेत्यांना मागता येणार आहे.  सर्वच मतदार संघातून इतर उमेदवारांचे वचननामे घेणे सुरू आहे. वचननामा द्या, कोणत्याही स्थितीत वचनाचा भंग होऊ देऊ नका,  असे आवाहन उमेदवारांना केले जात आहे.