केंद्रीय राखीव पोलीस दलाच्या वर्धापनदिनानिमित्त रक्तदान व आरोग्यसेवेचा प्रेरणादायी उपक्रम

लोकस्पर्श न्यूज नेटवर्क,

अहेरी (गडचिरोली) : राष्ट्राच्या अंतर्गत सुरक्षेची जबाबदारी खांद्यावर घेत असतानाच समाजाशी मानवी नाते जपण्याची परंपरा जपणाऱ्या Central Reserve Police Force च्या ८७ व्या वर्धापन दिनानिमित्त अहेरी तालुक्यातील कोठी व प्राणहिता परिसरात आरोग्यसेवा व रक्तदानाचा प्रेरणादायी उपक्रम राबविण्यात आला. दुर्गम भागातील नागरिकांच्या आरोग्याची काळजी आणि मानवतेचा संदेश यांचा संगम या उपक्रमातून अनुभवास आला.

दिनांक ६ मार्च २०२६ रोजी कोठी परिसरातील गावांतील नागरिकांच्या सोयीसाठी पोलीस ठाणे कोठी येथे जी/३७ बटालियनच्या वतीने मोफत वैद्यकीय शिबिराचे आयोजन करण्यात आले. या शिबिरात दलाच्या वैद्यकीय अधिकाऱ्यांनी परिसरातील नागरिकांची सखोल आरोग्य तपासणी करून त्यांना आवश्यक ती औषधे विनामूल्य उपलब्ध करून दिली. दुर्गम आदिवासी पट्ट्यातील अनेक ग्रामस्थांनी या आरोग्यसेवेचा लाभ घेतला.

व्हॉट्सअॅप ग्रुप ही लिंक वापरून जॉइन करा

त्यानंतर दिनांक ७ मार्च २०२६ रोजी अहेरी येथील प्राणहिता पोलीस छावणीत ०९ व ३७ बटालियनच्या संयुक्त विद्यमाने रक्तदान शिबिर आयोजित करण्यात आले. या उपक्रमात जवानांसह स्थानिक नागरिकांनीही उत्साहाने रक्तदान करून मानवसेवेची भावना प्रकट केली. उपजिल्हा रुग्णालयाच्या वैद्यकीय पथकाने रक्तसंकलनाची जबाबदारी पार पाडत कार्यक्रम यशस्वी होण्यासाठी सहकार्य केले.

या कार्यक्रमाचे उद्घाटन ३७ बटालियनचे कमांडंट देव इंजिकरण किंडो यांच्या हस्ते झाले. यावेळी ०९ बटालियनचे मुख्य वैद्यकीय अधिकारी डॉ. डी. एस. मोहन, द्वितीय कमांड अधिकारी सत्य नारायण मीना, द्वितीय कमांड अधिकारी बी. व्यंकट रेड्डी तसेच ३७ बटालियनचे उपकमांडंट अनिल चंद्रमोरे उपस्थित होते. याशिवाय दोन्ही बटालियनचे अधिकारी व जवान तसेच आरोग्य विभागाच्या वैद्यकीय पथकाने या उपक्रमात सक्रिय सहभाग नोंदवला.

टेलिग्राम बातम्यांसाठी लिंक क्लिक करा

दुर्गम आणि आदिवासीबहुल भागात केवळ सुरक्षा देणे एवढ्यावर मर्यादित न राहता आरोग्यसेवा, सामाजिक जाणीव आणि मानवी संवेदना यांचे दर्शन घडविणारा हा उपक्रम ठरला. जवान आणि नागरिकांनी एकत्र येत दाखविलेल्या या सहभागामुळे समाजात विश्वास, आपुलकी आणि परस्पर सहकार्याची भावना अधिक दृढ झाल्याचे चित्र या उपक्रमातून दिसून आले.