पोलीस भरतीसाठी आलेल्या तरुणांना मोफत निवास-भोजनाची आधारवाट

लोकस्पर्श न्यूज नेटवर्क,

ओमप्रकाश चुनारकर,

गडचिरोली : महाराष्ट्राच्या नकाशावर गडचिरोली जिल्ह्याचे नाव घेतले की दोन शब्द सहज आठवतात—आदिवासी बहुल आणि नक्षलग्रस्त. दाट अरण्ये, खोल दऱ्या, नदी-नाले, उंच टेकड्या आणि कोसो दूर पसरलेली लहान लहान आदिवासी गावे—अशी या भूमीची ओळख. आजही अनेक भागांत पक्के रस्ते नाहीत; नदी-नाल्यांतून, कच्च्या पायवाटांवरून चालतच गावोगावी पोहोचावे लागते. कधीकाळी नक्षलवादाच्या सावटामुळे भयाचे वातावरण होते; आज परिस्थिती बदलू लागली असली तरी त्या आठवणी अजूनही या प्रदेशाच्या इतिहासात कोरलेल्या आहेत.

व्हॉट्सअॅप ग्रुप ही लिंक वापरून जॉइन करा

याच दुर्गम आदिवासी पट्ट्यातील अनेक युवकांच्या मनात आता एक नवे स्वप्न आकार घेऊ लागले आहे—पोलीस बनून समाजाच्या सुरक्षेसाठी उभे राहण्याचे स्वप्न. भामरागड, एटापल्ली, अहेरी, सिरोंचा, कोरचीसारख्या दुर्गम भागांतून तरुण धैर्याने बाहेर पडत आहेत. अनेकदा घरची आर्थिक परिस्थिती बेताची; खिशात फारसे पैसे नाहीत. तरीही घरच्यांकडून उधार-उसनी करून, कष्टाची जमवाजमव करून हे युवक भरती प्रक्रियेसाठी शहराचा प्रवास करतात.मात्र गडचिरोलीसारख्या शहरात पोहोचल्यावर त्यांच्या समोर उभा राहतो तो राहण्याचा आणि पोटभरण्याचा मोठा प्रश्न. अनोळखी शहर, खिशात मर्यादित पैसे, भरतीची धावपळ—या सगळ्या परिस्थितीत निवास व भोजनाची व्यवस्था करणे अनेकांसाठी अत्यंत कठीण ठरते.

अशा वेळी समाजातून एखादा संवेदनशील हात पुढे आला, तर त्या थकलेल्या प्रवासाला माणुसकीचा आधार मिळतो. याच भावनेतून राष्ट्रवादी युवक काँग्रेसचे जिल्हाध्यक्ष व नगर परिषद पाणीपुरवठा सभापती लिलाधर भरडकर यांनी समाजाभिमुखतेचा प्रेरणादायी आदर्श घालून दिला आहे.पोलीस शिपाई व चालक पोलीस शिपाई भरतीसाठी गडचिरोलीत आलेल्या युवक-युवतींसाठी त्यांनी मोफत निवास आणि भोजनाची व्यवस्था उभारली. १० फेब्रुवारी ते ६ मार्च २०२६ या कालावधीत सेमाना बायपास मार्गावरील ‘ग्रॅन्ड हॉटेल’ येथे हा उपक्रम राबविण्यात आला.सलग २१ दिवस चाललेल्या या सेवेत तब्बल ३ हजार १५६ उमेदवारांनी लाभ घेतला. रोज शेकडो युवक येथे विश्रांती घेत होते, पोटभर जेवण करत होते आणि दुसऱ्या दिवशीच्या शारीरिक चाचणीसाठी नव्या उमेदीने मैदानात उतरात होते.

टेलिग्राम बातम्यांसाठी लिंक क्लिक करा

गडचिरोली पोलीस कवायत मैदानावर ७३४ पदांसाठी जवळपास २७ हजार उमेदवारांनी अर्ज केला आहे. या पार्श्वभूमीवर शहरातील निवासव्यवस्था अपुरी पडत असताना हा उपक्रम अनेकांसाठी अक्षरशः जीवनदायी ठरला.पोलिस मुख्यालयापासून अवघ्या ३०० मीटर अंतरावर असलेल्या या केंद्रात उमेदवारांना साधे पण पौष्टिक भोजन—वरण-भात, पोळी-भाजी—पुरविण्यात आले. थकलेल्या प्रवासानंतर मिळणारे हे ताट म्हणजे केवळ अन्न नव्हते; ते होते संघर्ष करणाऱ्या स्वप्नांना दिलेले समाजाचे मौन आश्वासन.या उपक्रमाचे वैशिष्ट्य म्हणजे त्यामागील सातत्य आणि सेवाभाव. मागील पाच वर्षांपासून पोलीस आणि वनरक्षक भरतीच्या काळात हा उपक्रम अखंड सुरू आहे. हजारो युवक-युवतींना या सेवेतून आधार मिळाला आहे.

आज जे तरुण पोलीस म्हणून निवड होणार आहेत, त्यांच्याही मनात या दिवसांची एक आठवण कायम जिवंत राहणार आहे—गडचिरोलीच्या एका ठिकाणी मिळालेला निवास, मिळालेला जेवणाचा ताट आणि अनोळखी शहरात मिळालेला माणुसकीचा हात.या उपक्रमात आमदार धर्मराव बाबा आत्राम यांच्या मार्गदर्शनाखाली सिनेट सदस्य तनुश्री आत्राम , जिल्हाध्यक्ष रवींद्र वासेकर, श्रीनिवास गोडसेलवार, ऋषिकांत पापडकर शहराध्यक्ष अमोल कुडमेथे , जिल्हा उपाध्यक्ष प्रसाद पवार, तालुका अध्यक्ष कुणाल चिलगेलवार तसेच ‘स्वप्नझेप’ अकादमीचे संचालक सुमित चव्हान यांच्यासह अनेक पदाधिकारी व स्वयंसेवकांनी सक्रिय योगदान दिले.आजच्या काळात स्वार्थ आणि स्पर्धेची धावपळ वाढत असताना, गडचिरोलीतील हा छोटासा उपक्रम एक मोठा संदेश देऊन जातो—दुर्गम पायवाटांवरून चालत आलेल्या स्वप्नांना जेव्हा माणुसकीचा हात भेटतो,तेव्हा त्या स्वप्नांना केवळ पंखच मिळत नाहीत,तर समाजावरचा विश्वासही नव्याने बहरतो.आणि म्हणूनच या हजारो युवकांच्या मनात गडचिरोलीतील त्या दिवसांची आठवण कायम राहणार आहे—संघर्षाच्या प्रवासात भेटलेल्या एका माणुसकीच्या हाताची.