छत्तीसगडच्या दंतेवाडात 32 नक्षलवाद्यांचे आत्मसमर्पण.

लोक स्पर्श नेटवर्क

रायपूर, 26 ऑक्टोबर : छत्तीसगडच्या दंतेवाडामध्ये , रविवारी 32 नक्षलवाद्यांनी आत्मसमर्पण केले. यामध्ये 10 महिलांचाही समावेश आहे. हे सर्वजण बाससोर पोलीस ठाण्यात एकत्र हजर झाले. पोलिसांनी घेतलेल्या पुनर्वसन शिबिरामुळे प्रभावित होऊन नक्षलवाद्यांनी हा निर्णय घेतल्याचे दंतेवाडाचे पोलीस अधिक्षक अभिषेक पल्लव यांनी सांगितले.

व्हॉट्सअॅप ग्रुप ही लिंक वापरून जॉइन करा

पल्लव यांनी दिलेल्या माहितीनुसार आत्मसमर्पण केलेल्या 32 नक्षल्यांपैकी 19 जण बाकेली गावचे, चौघे जण कोरकोट्टी आणि तीघे अनुक्रमे उडनेर, तुमारीगुंडा आणि मत्साई गावातील आहेत. सुरक्षेच्या कारणास्तव पोलीसांनी त्यांची ओळख उघड केलेली नाही. हे नक्षलवादी ‘दंडकारण्य आदिवासी किसान मजदूर संघटन’ आणि ‘क्रांतीकारी महिला आदिवासी संघटन’ या दोन संघटनांशी संलग्न आहेत. यातील चौघांवर प्रत्येकी एक लाख रुपयांचे बक्षिस ठेवण्यात आलेले आहे. या सर्वांच्या नावावर पोलिसांवर हल्ले करणे, गस्तीवर असणाऱया पथकांवार हल्ले करणे, आयईडी ब्लास करणे यासारख्या गुन्ह्यांची नोंद आहे. आत्मसमर्पण करणा-या नक्षलवाद्यांना प्रत्येकी 10 हजार रुपयांची मदत देण्यात आली आहे. शासनाच्या पुनर्वसन नियमांनुसार त्यांना पुढील सर्व सुविधाही दिल्या जाणार आहेत. दंतेवाडा पोलिसांनी सुरू केलेल्या ‘लोण वरत्तु’ या मोहिमेत पोलिसांना यश येत असल्याचे दिसते आहे. यावर्षी जून महिन्यापासून या मोहिमेला सुरुवात झाली आहे. दंतेवाडा येथे आतापर्यंत एकूण 150 नक्षलवाद्यांनी आत्मसमर्पण केल्याची माहिती पोलिसांनी दिली.