मुक्तीपथ अभियानाच्या वतीने आरमोरी व गडचिरोली येथील तालुका क्लिनिकतुन 25 रुग्णांवर उपचार

लोकस्पर्श न्यूज नेटवर्क

गडचिरोली, दि. 18 जानेवारी: मुक्तीपथ अभियानाच्या वतीने आरमोरी व गडचिरोली येथील तालुका कार्यालयात सोमवारी व्यसन उपचार क्लिनिकचे आयोजन केले होते. दोन्ही क्लिनिकच्या माध्यमातून एकूण 25 रुग्णांनी उपचार घेत दारू सोडण्याचा निर्धार केला.

आरमोरी शहरातील नवीन बसस्थानकाच्या मागे शिक्षक कॉलनीतील मुक्तीपथ तालुका कार्यालयात उपचार क्लिनिकचे आयोजन केल्या जाते. दारू सोडण्याची इच्छा असणाऱ्या 14 रुग्णांनी क्लिनिकला भेट दिली. गडचिरोली शहरातील बस डेपो जवळील स्वराज हेल्थ क्लब समोर असलेल्या मुक्तिपथ तालुका कार्यालयात 11 रुग्णांनी भेट देऊन उपचार घेतला. दोन्ही तालुका क्लिनिकच्या माध्यमातून एकूण 25 रुग्णांवर उपचार व औषधोपचार करण्यात आला.

व्हॉट्सअॅप ग्रुप ही लिंक वापरून जॉइन करा

यावेळी दारूचे व्यसन हा एक मानसिक आजार आहे आणि तो उपचाराने बरा होतो. दारूची सवय सोडण्यासाठी तसेच यातून उद्भवणारा त्रास कमी करण्यासाठी उपचार घेणे आवश्यक आहे. दारूची सवय कशी लागते, शरीरावर कोणते दुष्परिणाम दिसतात, धोक्याचे घटक, नियमित औषोधोपचार घेणे आदींची माहिती देत व्यसनी रुग्णांना समुपदेशन करण्यात आले. मुक्तीपथ तालुका कार्यालयांमध्ये ठराविक दिवशी क्लिनिकचे आयोजन केल्या जाते. दारूचे व्यसन सोडण्याची इच्छा असणा-या जास्तीत जास्त रुग्णांनी क्लिनिकला भेट देण्याचे आवाहन केले आहे.