सावित्रीबाई फुले कनिष्ठ महाविद्यालयात संविधान दिन मूल्यजागर

लोकस्पर्श न्यूज नेटवर्क,

ओमप्रकाश चुनारकर,

गडचिरोली, दि.२७  : सांविधानिक मूल्यांची जाणीव, लोकशाहीचे भान आणि नागरिकत्वाची जबाबदारी यांचा दृढ संस्कार विद्यार्थ्यांत रुजवण्याच्या उद्देशाने सावित्रीबाई फुले कनिष्ठ महाविद्यालय, आलापल्ली येथे संविधान दिन अत्यंत प्रेरणादायी आणि विचारगर्भ वातावरणात साजरा करण्यात आला. या विशेष प्रसंगी महाविद्यालयाचे प्राचार्य पि. डी. मेश्राम यांनी भारतीय संविधानाचे शिल्पकार, जागतिक मानवतावादी विचारांचे पुरस्कर्ते भारतरत्न डॉ. बाबासाहेब आंबेडकर यांच्या प्रतिमेस पुष्पहार अर्पण करून कार्यक्रमाची सुरुवात केली.

प्राचार्य मेश्राम यांनी विद्यार्थ्यांना संविधानातील मुख्य मूल्ये — स्वातंत्र्य, समता, बंधुता आणि न्याय यांचे महत्त्व समजावून सांगत संविधान हा केवळ कायद्यांचा संच नसून भारताची आत्मा असल्याचे प्रतिपादन केले. नागरिकांचे अधिकार, विशेषतः अभिव्यक्तिस्वातंत्र्य, शिक्षणाचा अधिकार, समान वागणूक आणि सामाजिक न्याय यांची महत्वाची माहिती त्यांनी विद्यार्थ्यांना दिली. त्याचबरोबर प्रत्येक भारतीयाचे कर्तव्य, राष्ट्रनिष्ठा आणि संवैधानिक कर्तव्यपालनाची जबाबदारी यांची जाणिवही विद्यार्थ्यांच्या मनात दृढ केली.

यानंतर उपस्थितांनी संविधान प्रास्ताविकेचे सामूहिक वाचन केले. प्रास्ताविकेतील प्रत्येक शब्दाची ताकद, इतिहासातील संघर्ष आणि आधुनिक भारत घडवण्यात त्यांची भूमिका यावर विद्यार्थ्यांना सविस्तर मार्गदर्शन करण्यात आले.

संविधान दिनानिमित्त महाविद्यालयात विविध स्पर्धा व उपक्रमांचे आयोजन करण्यात आले. त्यात वक्तृत्व स्पर्धा, ज्यामध्ये विद्यार्थ्यांनी संविधान, लोकशाही, मानवी हक्क, सामाजिक समता अशा विषयांवर प्रभावी भाषणे केली. चित्रकला स्पर्धेत विद्यार्थ्यांनी संविधानाचे आद्य मूल्य, राष्ट्रीय प्रतीके, स्वातंत्र्य आणि समता यांचे प्रतीकात्मक रेखाटन करून कलात्मक सादरीकरण केले. विविध उपक्रमांतून विद्यार्थ्यांच्या सृजनशीलतेसोबत समाजभानही प्रकर्षाने दिसून आले.

या कार्यक्रमात धाबेकर सर , तावडे सर यांनी विद्यार्थ्यांना प्रेरणादायी मार्गदर्शन केले. संविधानाचा उगम, उद्दिष्टे, सामाजिक परिवर्तनातील त्याचा वाटा आणि आजच्या तरुण पिढीची भूमिका यावर त्यांनी सखोल विचार मांडले. तरुणाईने संविधान हा केवळ अभ्यासाचा विषय न मानता, तो आयुष्यात आचरणात आणावा, असा संदेश त्यांनी दिला.

कार्यक्रमाचे अध्यक्षस्थान प्राचार्य पि. डी. मेश्राम सर यांनी भूषविले. संपूर्ण कार्यक्रमाचे संयोजन व संचालन श्री. भोयर सर यांनी अतिशय प्रभावीपणे केले. शेवटी कु. सरोज हेमके यांनी आभारप्रदर्शन करून सर्व मान्यवर, शिक्षकवर्ग, विद्यार्थ्यांचे स्वागत व सहभागाबद्दल कृतज्ञता व्यक्त केली.

कार्यक्रमाला महाविद्यालयातील ११वी व १२वीचे विद्यार्थी, तसेच शिक्षकवृंद मोठ्या संख्येने उपस्थित होते.या संविधान दिन साजरीकरणातून विद्यार्थी केवळ पुस्तकातील मजकूरापुरते मर्यादित न राहता, समाजाशी जोडलेली, संवैधानिक मूल्ये जपणारी, जागरूक आणि उत्तरदायी नागरिकत्वाची पावले टाकत असल्याचा आत्मविश्वास व्यक्त झाला. “सशक्त संविधान — सशक्त समाज” या भावनेला बळ मिळवून देणारा हा उपक्रम यशस्वीरीत्या पार पडला…

हे देखिल वाचा,

 

बस्तर रक्तरंगातून मुक्त — ४१ माओवादी शरणागतीने उग्रवादाचा कणाच खचला

संविधान मूल्ये कृतीत उतरविण्याची गरज : डॉ. पुरणचंद्र मेश्राम

 

अक्षय ऊर्जेच्या बळावर ग्रामीण समृद्धी— मुख्यमंत्री फडणवीसांच्या व्हिजनला गडचिरोलीत गती