महाआरोग्य सन्मान २०२६ : गडचिरोलीचा राज्यात झेंडा

लोकस्पर्श न्यूज नेटवर्क,

गडचिरोली : दुर्गम, नक्षलग्रस्त अशी ओळख पुसत आरोग्यसेवेच्या बळावर राज्यपातळीवर ठसा उमटवणाऱ्या गडचिरोली जिल्ह्याने ‘महाआरोग्य सन्मान २०२६’च्या रूपाने मानाचा मुकुट मिळवला आहे. चामोर्शी ग्रामीण रुग्णालयला संस्थात्मक गौरव मिळाला, तर जिल्हा सामान्य रुग्णालयातील शल्य चिकित्सक डॉ. कृणाल चेंडकापुरे आणि ग्रामीण रुग्णालय मुलचेराच्या वैद्यकीय अधीक्षक डॉ. स्मिता साळवे यांचा राज्यस्तरीय सन्मान करण्यात आला. मुंबईत झालेल्या सोहळ्यात आरोग्यमंत्री प्रकाश आबिटकर आणि राज्यमंत्री मेघनाताई बोर्डीकर यांच्या हस्ते हा पुरस्कार प्रदान करण्यात आला.

दुर्गम भागात शस्त्रक्रिया सेवा सक्षम करण्याचा ध्यास घेतलेल्या डॉ. कृणाल चेंडकापुरे यांनी सन २०२५-२६ या कालावधीत तब्बल ११७ हायड्रोसिल शस्त्रक्रिया यशस्वीपणे पूर्ण केल्या. जिल्हा स्तरावर एवढ्या मोठ्या संख्येने शस्त्रक्रिया स्थानिक पातळीवर पार पडणे ही केवळ आकडेवारी नाही; ती ग्रामीण रुग्णांच्या विश्वासाची नोंद आहे. मोठ्या शहरांकडे धाव घेण्याची वेळ टाळत सर्वसामान्यांना दर्जेदार शस्त्रक्रिया सेवा उपलब्ध करून देण्यात त्यांनी मोलाची भूमिका बजावली आहे. त्यामुळे जिल्हा सामान्य रुग्णालयावरील विश्वास अधिक दृढ झाला आहे.

‘स्वस्थ नारी, सशक्त परिवार’ या संकल्पनेला वास्तवात उतरविताना डॉ. स्मिता साळवे यांनी मुलचेरा परिसरातील माता-बाल आरोग्य सेवेला नवे बळ दिले. उच्च जोखमीच्या गर्भवतींचे व्यवस्थापन, संस्थात्मक प्रसूतींची वाढ, माता-बाल संगोपन सेवा आणि ग्रामीण भागातील आरोग्य जनजागृती उपक्रम यांमुळे दुर्गम भागातील महिलांपर्यंत प्रभावी सेवा पोहोचल्या. त्यांच्या नेतृत्वाखाली रुग्णालयाने केवळ उपचारच नव्हे तर विश्वासाचे नाते निर्माण केले.

चामोर्शी ग्रामीण रुग्णालयाने बाह्यरुग्ण-आंतररुग्ण सेवा, मोठ्या-लहान शस्त्रक्रिया, सामान्य व सिझेरियन प्रसूती, आपत्कालीन सेवा आणि आयुष्मान भारत डिजिटल मिशनअंतर्गत डिजिटल नोंदणी व सेवा अंमलबजावणी यात उल्लेखनीय कामगिरी बजावली आहे. राष्ट्रीय आरोग्य कार्यक्रमांची काटेकोर अंमलबजावणी आणि जनतेशी सातत्यपूर्ण संवाद यामुळे या रुग्णालयाने राज्यस्तरावर मानाचे स्थान मिळवले.

संस्थात्मक आणि वैयक्तिक या दोन्ही स्तरांवरील गौरवामुळे गडचिरोलीच्या आरोग्य यंत्रणेचे मनोबल उंचावले आहे. “दुर्गमतेवर मात करत गुणवत्तापूर्ण आरोग्य सेवा देण्याचा आमचा संकल्प अधिक दृढ झाला आहे,” अशी भावना जिल्हा शल्य चिकित्सक डॉ. वर्षा लहाडे यांनी व्यक्त केली.

आरोग्य सेवेच्या या यशोगाथेने एक गोष्ट स्पष्ट केली आहे—भौगोलिक मर्यादा असल्या तरी इच्छाशक्ती आणि नियोजनाच्या जोरावर विकासाचा नवा आदर्श उभा करता येतो. ‘महाआरोग्य सन्मान २०२६’ हा केवळ पुरस्कार नसून गडचिरोलीच्या समर्पित आरोग्यसेवेची राज्यस्तरीय पावती ठरली आहे.

हे देखील वाचा ,

उपमुख्यमंत्री अजितदादा पवार यांच्या जाण्याने महाराष्ट्राच्या राजकारणातील एक पुरोगामी नेतृत्व हरपले

देव मार्कंडाच्या वैनगंगेत खोल पाण्यात बुडणाऱ्या तिघांना पोलिसांनी वाचवले

महाविकास आघाडीच्या बैठकीला राष्ट्रवादी शरदचंद्र पवार पक्षाची दांडी