कर्तव्य, करुणा आणि माणुसकीचा प्रवास संपला; धुर्वे मेजरांना अखेरचा सलाम

लोकस्पर्श न्यूज नेटवर्क,

ओमप्रकाश चुनारकर,

गडचिरोली : काही माणसे आपल्या पदामुळे मोठी होत नाहीत, तर आपल्या कर्तृत्वाने, सेवाभावाने आणि माणुसकीच्या स्पर्शाने जनमानसात अजरामर होतात. अशाच व्यक्तिमत्त्वांपैकी एक नाव म्हणजे सहाय्यक पोलीस उपनिरीक्षक रेमाजी धुर्वे (धुर्वे मेजर). त्यांच्या निधनाने गडचिरोली जिल्ह्याने केवळ एक कर्तव्यदक्ष पोलीस अधिकारी गमावलेला नाही, तर दुःखात आधार देणारा, संकटात धावून जाणारा आणि माणुसकी जपणारा एक जिवंत आधारस्तंभ गमावला आहे.

व्हॉट्सअॅप ग्रुप ही लिंक वापरून जॉइन करा

जिल्हा सामान्य रुग्णालय, गडचिरोली येथील दवाखाना पोलीस चौकीचे प्रभारी म्हणून गेल्या दशकभराहून अधिक काळ त्यांनी अत्यंत प्रामाणिकपणे आणि संवेदनशीलतेने सेवा बजावली. रुग्णालयात येणाऱ्या प्रत्येक दुःखी कुटुंबाच्या वेदनांशी ते समरस होत असत. अपघातग्रस्तांच्या नातेवाईकांचा आक्रोश, आकस्मिक मृत्यूची हळहळ, वैद्यकीय कायदेशीर प्रक्रियेतील गुंतागुंत किंवा बेवारस मृतदेहांचा सन्मानपूर्वक अंत्यविधी—या प्रत्येक प्रसंगात धुर्वे मेजर हे केवळ अधिकारी म्हणून नव्हे, तर एक संवेदनशील माणूस म्हणून उभे राहत.

अनेक कुटुंबांसाठी ते प्रशासनाचा चेहरा नव्हते, तर संकटाच्या काळात धीर देणारे आपलेच माणूस होते. दुःखाने कोलमडलेल्या कुटुंबांच्या डोळ्यांतील अश्रू पुसण्याचा प्रयत्न करताना त्यांनी अनेकदा कर्तव्याच्या चौकटी ओलांडून माणुसकीचा हात पुढे केला. मृत व्यक्तींच्या नातेवाईकांना आवश्यक प्रक्रिया पूर्ण करून वेळेत पार्थिव ताब्यात मिळवून देणे, त्यांना योग्य मार्गदर्शन करणे आणि मानसिक आधार देणे, हे त्यांनी आपल्या सेवाधर्माचा अविभाज्य भाग बनविले होते.

टेलिग्राम बातम्यांसाठी लिंक क्लिक करा

विशेषतः कोरोना महामारीच्या अभूतपूर्व संकटात त्यांनी बजावलेली भूमिका अतुलनीय ठरली. सर्वत्र भीतीचे वातावरण असताना, मृत्यूचे सावट गडद होत असताना आणि अनेकजण स्वतःच्या सुरक्षेची चिंता करत असताना धुर्वे मेजर मात्र सेवेसाठी खंबीरपणे उभे राहिले. जीवाची पर्वा न करता त्यांनी असंख्य रुग्ण, नातेवाईक आणि गरजू नागरिकांना मदतीचा हात दिला. संकटाच्या त्या काळात त्यांनी दाखविलेली कर्तव्यनिष्ठा, धैर्य आणि मानवतेची जपणूक ही गडचिरोलीच्या इतिहासातील एक प्रेरणादायी अध्याय म्हणून कायम स्मरणात राहील.

परंतु नियतीने अत्यंत वेदनादायी घाव घातला….

दि. २९ मे २०२६ रोजी एका मर्ग प्रकरणाच्या पंचनाम्यासाठी कर्तव्यावर जात असताना त्यांचा दुर्दैवी अपघात झाला. या घटनेची माहिती मिळताच पोलीस प्रशासनाने तातडीने हालचाली करून त्यांना हेलिकॉप्टरद्वारे नागपूर येथे उपचारासाठी रवाना केले. पोलीस अधीक्षक एम. रमेश यांच्या विशेष प्रयत्नांतून त्यांना त्वरित वैद्यकीय मदत उपलब्ध करून देण्यात आली. त्यांच्या प्रकृतीत सुधारणा व्हावी यासाठी संपूर्ण जिल्हा प्रार्थना करत होता. पोलीस दल, मित्रपरिवार, सामाजिक क्षेत्रातील मान्यवर आणि सर्वसामान्य नागरिक आशेने त्यांच्या प्रकृतीकडे डोळे लावून होते.

मात्र काळाचा निर्णय वेगळाच होता….

मृत्यूशी सुरू असलेली त्यांची झुंज अखेर थांबली आणि आयुष्यभर इतरांच्या वेदनांवर फुंकर घालणारा हा सेवाव्रती योद्धा अनंताच्या प्रवासाला निघून गेला .आज जिल्हा रुग्णालयातील दवाखाना पोलीस चौकीतील ती खुर्ची रिकामी झाली आहे. मदतीसाठी सदैव तत्पर असलेली पावले थांबली आहेत. दुःखात खचलेल्या कुटुंबांना धीर देणारा तो आत्मीय आवाज कायमचा शांत झाला आहे. मात्र त्यांनी जपलेली माणुसकी, त्यांनी कमावलेला लोकविश्वास आणि त्यांनी केलेली निस्वार्थ सेवा काळाच्या ओघात कधीही विस्मृतीत जाणार नाही.

गडचिरोली पोलीस दलाने एक कर्तव्यनिष्ठ अधिकारी गमावला असला, तरी समाजाने त्याहून मोठी हानी सोसली आहे. कारण धुर्वे मेजर हे केवळ पोलीस अधिकारी नव्हते; ते दुःखाच्या क्षणी धावून येणारे आधारवड, निराशेच्या अंधारात आशेचा किरण आणि माणुसकीच्या मूल्यांचे जिवंत प्रतीक होते.

रेमाजी धुर्वे (धुर्वे मेजर) हे नाव आता एका व्यक्तीपुरते मर्यादित राहिलेले नाही; ते सेवाभाव, कर्तव्यनिष्ठा, संवेदनशीलता आणि मानवतेचे प्रतीक बनले आहे…