१६ ड्रम सडवा नष्ट : सीमावर्ती भागात अहिंसक कृती

गडचिरोली : गडचिरोली व धानोरा तालुक्याच्या सीमावर्ती भागातील जंगलपरिसरात अहिंसक कृती करीत १६ ड्रम मोहफुलाच्या सडव्यासह दोन हातभट्टी व साहित्य नष्ट करण्यात आले. ही कृती संबंधित गावातील गाव संघटनेच्या मदतीने धानोरा व गडचिरोली मुक्तिपथ तालुका चमूने केली.

गडचिरोली व धानोरा या दोन्ही तालुक्याच्या सीमेवर घनदाट जंगल आहे. या जंगलाचाच आधार घेत घोटेविहीर व सीताटोला परिसरातील दारूविक्रेते हातभट्टी लावून दारू गाळतात. या विक्रेत्यांविरोधात अनेकदा कृती करूनही त्यांनी आपला अवैध व्यवसाय सुरूच ठेवला आहे. परिणामी परिसरातील गावांना नाहक त्रास सहन करावा लागतो. गाव संघटनेच्या माध्यमातून सुद्धा अवैध दारूविक्रीविरोधात अनेक उपक्रम राबवून अवैध व्यवसाय बंद करण्याचे आवाहन केले जाते. परंतु, मुजोर दारूविक्रेते जंगलपरिसरात दारू गाळून परिसरातील किरकोळ विक्रेत्यांना पुरवठा करतात. अशातच जंगलपरिसात विक्रेत्यांनी हातभट्टी लावली असल्याची माहिती गाव संघटनेच्या माध्यमातून प्राप्त होताच दोन्ही तालुक्यातील मुक्तिपथ तालुका चमूने घोटेविहीर,सीताटोला जंगलपरिसरात शोधमोहीम राबविली. यावेळी दोन ठिकाणी चालू हातभट्टी आढळून आली. घटनास्थळावर अधिक पाहणी केली असता मिळून आलेले १६ ड्रम मोहफुलाचा सडवा व साहित्य नष्ट करण्यात आले