राष्ट्रीय महामार्ग ६३ वरील वडदमजवळ सागवान वृक्ष कोसळला; वनविभागाच्या तत्परतेने वाहतूक केली सुरळीत

लोकस्पर्श न्यूज नेटवर्क 

धर्मराजु वडलाकोंडा,

सिरोंचा प्रतिनिधी,२६ जुलै : राष्ट्रीय महामार्ग क्रमांक ६३ वरील वडदम गावाजवळ आज दुपारी साडेतीनच्या सुमारास सागवान जातीचे एक प्रचंड झाड अचानक रस्त्यावर कोसळले. या घटनेमुळे काही काळासाठी दोन्ही दिशांची वाहतूक पूर्णपणे ठप्प झाली होती. रस्ता अडवल्याने महाराष्ट्र, छत्तीसगड आणि तेलंगणा या तीन राज्यांदरम्यानचा महत्त्वाचा संपर्क दुवा खंडित झाला होता. मात्र वनविभागाच्या दक्षतेमुळे केवळ तासाभरातच मार्ग पुन्हा मोकळा करण्यात आला, ही बाब विशेष उल्लेखनीय ठरली.

व्हॉट्सअॅप ग्रुप ही लिंक वापरून जॉइन करा

हा राष्ट्रीय महामार्ग सिरोंचा तालुक्याला छत्तीसगडमधील जगदलपूर तसेच तेलंगणातील आदिलाबाद, मंचेरियाल यांसारख्या शहरांशी जोडणारा मुख्य मार्ग आहे. त्यामुळे झाड कोसळल्याने फक्त स्थानिकच नव्हे, तर या मार्गावरून नियमित प्रवास करणाऱ्या वाहनचालकांनाही अडथळ्यांना सामोरे जावे लागले. काही वेळात वाहनांच्या रांगा लागून वाहतूक ठप्प झाली होती.

घटनेची माहिती मिळताच आसरली वन विभागाचे अधिकारी रामचंद्र तोकला यांच्या मार्गदर्शनाखाली वनपरिक्षेत्राचे क्षेत्र सहाय्यक डी. एस. चिव्हाने यांनी तातडीने कृतीस प्रारंभ केला. त्यांच्या नेतृत्वाखाली नियत वनरक्षक डी. यू. गीते, हरिप्रसाद दासरी आणि समया नर्सिंग या कर्मचाऱ्यांनी घटनास्थळी पोहोचून योग्य ती सुरक्षा खबरदारी घेत झाड हटवण्याचे काम युद्धपातळीवर सुरू केले. सुसज्ज यंत्रसामग्री आणि सहकार्याने झाड हटवून अवघ्या तासाभरात वाहतूक सुरळीत करण्यात आली.

टेलिग्राम बातम्यांसाठी लिंक क्लिक करा

या संपूर्ण प्रक्रियेत वनविभागाच्या कर्मचाऱ्यांनी दाखवलेली तत्परता, समन्वय आणि कार्यकुशलता याचे सर्वत्र कौतुक होत आहे. गावकऱ्यांसह प्रवाशांनी वनविभागाच्या त्वरित प्रतिसादाबद्दल समाधान व्यक्त करत ‘हीच खरी जनसेवा’ अशी भावना व्यक्त केली.

सद्यस्थितीत हवामान बदलाचे आणि मुसळधार पावसाचे संकट निर्माण होत असताना अशा दुर्घटनांचा धोका वाढत आहे. त्यामुळे अशा आपत्तींच्या प्रसंगी प्रशासनाची सजगता आणि तत्परता अत्यावश्यक ठरते, हे या घटनेने पुन्हा एकदा अधोरेखित केले आहे.स्थानिक सामाजिक कार्यकर्ते आणि ग्रामस्थांनीही वनविभागाचे आभार मानले आहेत..