गडचिरोलीत राष्ट्रीय लोकअदालतीचा यशस्वी आयोजन: ९७ लाख रुपयांची वसुली, १२२ प्रकरणांत तडजोड

लोकस्पर्श न्यूज नेटवर्क 

गडचिरोली : राष्ट्रीय विधी सेवा प्राधिकरण, नवी दिल्ली यांच्या आदेशानुसार आणि मुंबई उच्च न्यायालयाच्या निर्देशानुसार, महाराष्ट्र राज्य विधी सेवा प्राधिकरणाच्या मार्गदर्शनाखाली गडचिरोली जिल्हा आणि तालुका न्यायालयांत आज दिनांक १० मे २०२५ रोजी राष्ट्रीय लोकअदालतीचे आयोजन करण्यात आले. या लोकअदालतीत प्रलंबित आणि दाखलपूर्व अशा एकूण १२२ प्रकरणांमध्ये तडजोड साधण्यात आली असून, एकूण ९७ लाख ५२ हजार ४९१ रुपयांची वसुली करण्यात आली.

या लोकअदालतीमध्ये फौजदारी तडजोड प्रकरणे, धनादेश कायद्यान्वये कलम १३८ अंतर्गत येणारी प्रकरणे, कौटुंबिक वाद, मोटार अपघात दावे, बँकांकडील कर्जवसुली, वीजबिल थकबाकी, ग्रामपंचायतींचे घरपट्टी व पाणीपट्टीसंबंधी वसुली, ग्राहक तक्रारी व वाहतूक नियम उल्लंघनाशी संबंधित प्रकरणांचा समावेश होता. किरकोळ गुन्ह्यांपैकी ५४ प्रकरणे आरोपींकडून गुन्हा कबूल झाल्याने निकाली काढण्यात आली.

व्हॉट्सअॅप ग्रुप ही लिंक वापरून जॉइन करा

विशेषतः, पॅनल क्रमांक २ मध्ये एक वैवाहिक वाद आपसी समझोत्याने निकाली काढण्यात आला. संबंधित पती-पत्नीने पुन्हा एकत्र नांदण्याचा निर्णय घेतल्यामुळे न्यायालयाच्या वतीने त्यांचा साडी-चोळी व शेला देऊन सन्मानपूर्वक सत्कार करण्यात आला.

ही लोकअदालत प्रमुख जिल्हा व सत्र न्यायाधीश मा. विनायक जोशी (अध्यक्ष, जिल्हा विधी सेवा प्राधिकरण) आणि न्या. आर. आर. पाटील (सचिव) यांच्या देखरेखीखाली पार पडली. पॅनल क्रमांक १ चे कामकाज पी. आर. सित्रे, पॅनल क्रमांक २ चे एस. पी. सदाफळे, तर पॅनल क्रमांक ३ चे एस. बी. विजयकर यांनी पाहिले. किरकोळ गुन्ह्यांची सुनावणी न्या. व्ही. आर. मालोदे यांच्या न्यायालयात पार पडली.

टेलिग्राम बातम्यांसाठी लिंक क्लिक करा

या लोकअदालतीमध्ये मनोहर हेपट, देवाजी बावने आणि अर्चना चुधरी यांनी पॅनल सदस्य म्हणून सहभाग घेतला. गडचिरोली जिल्हा अधिवक्ता संघाचे अध्यक्ष किशोर आखाडे, अन्य वरिष्ठ अधिवक्ते, संपूर्ण अधिवक्ता वर्ग, न्यायालयीन कर्मचारी व विधी सेवा प्राधिकरणाचे अधिकारी-कर्मचारी यांनी हे आयोजन यशस्वी करण्यासाठी मोलाची भूमिका बजावली.