रायगडचे वनअधिकारी ATS च्या रडारवर

लोकस्पर्श न्यूज नेटवर्क,

रत्नागिरी व सिंधुदुर्ग जिल्ह्यातील कात कारखाने आणि गुजरातमधून चोरीच्या खैर लाकडाची तस्करी यामध्ये दहशतवादी कारवायांसाठी आर्थिक रसद पुरविणाऱ्या व्यक्तींचा सहभाग असल्याचे धक्कादायक प्रकार उघड झाले आहेत. उच्च न्यायालयाने या प्रकरणाची गंभीर दखल घेत कारखाने बंद करण्याचे आदेश दिले आहेत. गुजरात एटीएस आणि ईडीच्या संयुक्त तपासणीमुळे हे प्रकरण उघडकीस आले.

रत्नागिरी आणि रायगडातील दुवे स्पष्ट होत आहेत?
गुजरातमधून चोरीचा माल रत्नागिरी आणि रायगड जिल्ह्यांतील काही कात कारखान्यांपर्यंत पोहोचवण्यात आला होता. या तस्करीच्या नेटवर्कमध्ये रायगडमधील वनअधिकाऱ्यांचा सहभाग असल्याची शक्यता आहे. रत्नागिरीतील कात कारखान्यांशी संबंधित काही व्यक्ती राजकीय ओळखीचा वापर करून या तस्करीस पाठबळ देत असल्याचे समोर येत आहे.

व्हॉट्सअॅप ग्रुप ही लिंक वापरून जॉइन करा

मंत्री कदम यांचा ‘राइट हँड’ दलालीत गुंतला?
रत्नागिरीतील खेड भागात मंत्री कदम यांचा ‘राइट हँड’ म्हणून ओळखला जाणारा एक रेल्वे कर्मचारी या तस्करीत दलाल म्हणून भूमिका बजावत असल्याचे सांगितले जात आहे. गुजरातमधून खैर लाकडाच्या गाड्या रत्नागिरीत आणण्यासाठी त्याने राजकीय ओळख वापरल्याचे पुरावे हाती लागले आहेत. पकडलेल्या गाड्यांना राजकीय पुढाऱ्यांची ओळख सांगून सोडवण्यात आल्याचेही समोर आले आहे.

परजिल्हा आणि परराज्यातून चोरीचा खैर रत्नागिरीत कसा येतो?
सदर रत्नागिरीतील कात कारखान्यांमध्ये पुणे, सातारा, रायगड, सोलापूर, बीड, जालना, ठाणे, कोल्हापूर, बुलढाणा अशा जिल्ह्यांमधून मोठ्या प्रमाणात चोरीचा खैर माल पोहोचवला जातो. तसेच गुजरात, मध्य प्रदेश, कर्नाटक, आसाम, ओरिसा, आणि छत्तीसगड यांसारख्या राज्यांमधूनही चोरीचा खैर लाकूड आणले जात असल्याचे उघड झाले आहे.

टेलिग्राम बातम्यांसाठी लिंक क्लिक करा

सावर्डेतील सिंडिकेट कात कारखाना आणि विक्रांत तेटांबे
गुजरातमधून चोरीचा खैर सावर्डे येथील सिंडिकेट नावाच्या कात कारखान्यात जात होता. या कारखान्याचे मालक विक्रांत तेटांबे आहेत. नाशिक वन विभागाने या कारखान्यांवर छापे टाकले आणि मोठ्या प्रमाणात खैर लाकूड जप्त केले. पकडलेल्या गाड्यांच्या तपासातून विक्रांत तेटांबे यांच्या नेटवर्कचा तपशील समोर आला.

गुजरातच्या मालाचे प्रकरण: जैनुद्दीनची चौकशी आणि विक्रांत तेटांबे यांचा सहभाग

गुजरातमधून तस्करीच्या गाड्यांवर छापा टाकल्यानंतर गाडी चालक जैनुद्दीन याला अटक करून चौकशीसाठी कोर्टात हजर करण्यात आले. चौकशीदरम्यान विक्रांत तेटांबे यांच्या नेटवर्कमधील आणखी माहिती समोर आली. जैनुद्दीनकडून मिळालेल्या माहितीच्या आधारे विक्रांत तेटांबे यांनी गुजरातच्या मालाची जबाबदारी घेतल्याचे उघड झाले.

देशविघातक कारवायांशी संबंध
गुजरातमधून तस्करी करून आणलेला खैर लाकूड सावर्डे येथील सिंडिकेट कात कारखान्यात पाठवण्यात आला आणि त्यातून मिळालेला पैसा देशविघातक कारवायांमध्ये वापरण्यात आल्याचा संशय आहे. यामुळे राष्ट्रीय सुरक्षेवर मोठा परिणाम होऊ शकतो.

उच्च न्यायालयाचे आदेश आणि पुढील दिशा
उच्च न्यायालयाने १०२ पैकी ६० कात कारखाने बंद करण्याचे आदेश दिले असून उर्वरित कारखान्यांवर तपास सुरू आहे. दोषी अधिकाऱ्यांवर कठोर कारवाई करण्याचे निर्देश देण्यात आले आहेत.

वन विभागाची निष्क्रियता आणि भ्रष्टाचार
स्थानिक वन अधिकाऱ्यांनी तस्करीस प्रोत्साहन दिल्याच्या घटना समोर येत आहेत. भ्रष्टाचारामुळे तस्करीचे प्रमाण वाढल्याचे स्पष्ट झाले आहे.

रत्नागिरी व रायगडमधील कात कारखान्यांवर बंदी घालून देशविरोधी कारवायांना आळा घालण्यासाठी कठोर कारवाई करणे आवश्यक आहे. राजकीय हस्तक्षेप थांबवून या प्रकरणाची चौकशी अधिक तीव्र करण्यात यावी.