मुख्यमंत्री फडणवीस यांच्या उपस्थितीत गडचिरोली जिल्ह्यात १९ CSR उपक्रमांसाठी सामंजस्य करार

लोकस्पर्श न्यूज नेटवर्क 

गडचिरोली, दि. ७ जून : दुर्गम, आदिवासी आणि नक्षलग्रस्त अशी ओळख लाभलेला गडचिरोली जिल्हा आज विकासाच्या दिशेने एक मोठं पाऊल टाकताना पाहायला मिळाला. मुख्यमंत्री तथा जिल्ह्याचे पालकमंत्री देवेंद्र फडणवीस यांच्या प्रमुख उपस्थितीत गडचिरोली येथे एकूण १९ सामाजिक दायित्व (CSR) उपक्रमांसाठी जिल्हा प्रशासन आणि नामवंत खाजगी कंपन्यांमध्ये सामंजस्य करार (MoU) करण्यात आले. या करारांमुळे जिल्ह्याच्या सर्वांगीण विकासाला दिशा देणाऱ्या अनेक क्षेत्रांमध्ये प्रभावी काम सुरू होणार असून, हे सारे उपक्रम गडचिरोलीतील जनजीवनाच्या परिवर्तनाचा नवा अध्याय लिहिणारे ठरणार आहेत.

या सामंजस्य करारांमध्ये शिक्षण, आरोग्यसेवा, सौरऊर्जा, महिला सक्षमीकरण, पर्यावरण संवर्धन, कृषी विकास, पायाभूत सुविधा उभारणी, जलसंधारण, पोषण आणि ग्रामीण जीवनमान उन्नती यांचा समावेश आहे. विशेष म्हणजे, या उपक्रमांची रचना जिल्ह्याच्या. सामाजिक-भौगोलिक गरजांनुसार करण्यात आलेली असून, स्थानिक लोकसहभाग आणि उपयुक्तता याला केंद्रस्थानी ठेवण्यात आले आहे. केवळ आकड्यांच्या पातळीवर नव्हे, तर मूल्यांच्या अधिष्ठानावर आधारित असा हा CSR संकल्प गडचिरोलीसारख्या संवेदनशील जिल्ह्यात खऱ्या अर्थाने परिवर्तन घडवणारा ठरू शकतो.

राजकीय आणि प्रशासकीय नेतृत्वाची एकत्रित उपस्थिती; विकासाच्या दिशेने एकजूट..

या ऐतिहासिक प्रसंगी मुख्यमंत्री देवेंद्र फडणवीस यांच्यासोबत राज्याचे सहपालकमंत्री अॅड. आशिष जयस्वाल, अपर मुख्य सचिव मिलिंद म्हैसकर, जिल्हाधिकारी अविश्यांत पंडा, विशेष पोलीस महानिरीक्षक अंकीत गोयल, जिल्हा पोलीस अधीक्षक निलोत्पल, जिल्हा परिषदेचे मुख्य कार्यकारी अधिकारी सुहास गाडे, तसेच आमदार धर्मरावबाबा आत्राम, डॉ. मिलिंद नरोटे, रामदास मसराम आणि खासदार नामदेव किरसान हे मान्यवर उपस्थित होते. या उपस्थितीमधून केवळ एक सामंजस्य करार कार्यक्रम झाला नाही, तर शासकीय यंत्रणा आणि खासगी क्षेत्र यांच्यातील समन्वयाची एक ठोस झलक गडचिरोलीत अनुभवायला मिळाली.

 

CSR प्रकल्पांचे स्वरूप : समाजमूल्यांना धरून उभे राहणारे कृतीशील मॉडेल…

या सामंजस्य करारांतर्गत गडचिरोली जिल्ह्यात जे उपक्रम हाती घेण्यात येत आहेत, ते केवळ CSR चा पैसा वापरण्यापुरते मर्यादित नाहीत, तर ते समाजाच्या मूलभूत गरजांची दखल घेत वास्तवाशी जुळवून घेणारे, दीर्घकालीन परिणाम साधणारे आहेत.

काही महत्त्वपूर्ण उपक्रम पुढीलप्रमाणे:

BPCL कडून भाताच्या काड्यांपासून बायोगॅस आणि इथेनॉल निर्मितीचा प्रकल्प उभारण्यात येणार आहे. यामुळे कृषी सेंद्रियतेला चालना मिळेल, स्थानिकांना ऊर्जा स्वावलंबन प्राप्त होईल आणि पर्यावरणपूरक तंत्रज्ञान गावपातळीवर रुजेल.

हुंडई मोटर्स २०० शाळांमध्ये स्वच्छ पिण्याच्या पाण्याची सुविधा उपलब्ध करून देणार आहे, जे आरोग्यवर्धक बालशिक्षणाच्या दृष्टीने अत्यंत महत्त्वाचे आहे.

क्लीनमॅक्स व फार्मर्स फॉर फॉरेस्ट्स या संस्थांच्या माध्यमातून १५,६०० स्वच्छ चुली वाटप करण्यात येणार असून, त्यामुळे ग्रामीण घरांमध्ये आरोग्यदायी वातावरण निर्माण होईल आणि महिला व लहान मुलांच्या आरोग्यावर सकारात्मक परिणाम होईल.

एचडीएफसी लाइफ तर्फे गोंडेवाही येथे २०० एकर क्षेत्रावर बांबू लागवड करण्यात येणार असून, यामुळे स्थानिक रोजगार निर्माण होईल आणि हरित अर्थव्यवस्थेला बळ मिळेल.

सेल्को इंडिया १५ प्राथमिक आरोग्य केंद्रांमध्ये सौरऊर्जा प्रणाली बसवणार असून, आरोग्य सुविधा अखंड आणि स्वावलंबी होण्यास मदत होईल.

हिंदुस्तान युनिलिव्हर जलसंधारणाच्या माध्यमातून मामा तलाव परिसरात पाणलोट क्षेत्रात सुधारणा करणार आहे.

SBI, Axis Bank, NABARD, बाईफ, WOTR आदी संस्थांच्या माध्यमातून आदिवासी कुटुंबांचे उत्पन्न दुप्पट करणे, महिला सक्षमीकरण, पोषण कार्यक्रम, कृषिवनशैली (अ‍ॅग्रोफॉरेस्ट्री) आणि आदिवासी वसतिगृह उभारणीसारखे प्रकल्प राबवले जाणार आहेत.

हे सर्व प्रकल्प स्थानिक लोकांच्या प्रत्यक्ष जीवनाशी निगडित आहेत आणि त्यामुळे त्यांच्या यशस्वी अंमलबजावणीमुळे गडचिरोलीच्या जनतेच्या आयुष्यात वास्तवात भरीव बदल घडवण्याची शक्यता आहे.

CSR प्रतिनिधींचा समावेश – भागीदार नव्हे, परिवर्तनाचे शिल्पकार..

या उपक्रमांच्या यशस्वी अंमलबजावणीसाठी उपस्थित असलेले CSR क्षेत्रातील प्रतिनिधी केवळ औपचारिकताच निभावत नाहीत, तर विकासाच्या कामात सक्रिय भाग घेत आहेत. हुंडईचे शौरभ शर्मा, BPCL चे अभिजीत चव्हाण, क्लीनमॅक्सचे संदीप साहा, फार्मर्स फॉर फॉरेस्ट्सचे अश्वनी परमार, सेल्कोचे अमोघ ममदापुर, बाईफचे भारत काकडे, WOTR चे गणपत काबाडी, वेदांता लिमिटेडचे शशी अरोरा, जैतापूर प्रकल्पाचे अशुतोष शेओपुरे यांच्यासारख्या प्रतिनिधींच्या सहभागातून हा CSR कार्यक्रम केवळ निधीपुरता मर्यादित न राहता प्रत्यक्ष काम करणाऱ्या लोकांपर्यंत पोहचणार आहे.