नक्षलवाद हद्दपार केल्यावर आता घाणही हद्दपार ;अहेरीत सीआरपीएफ ३७ बटालियनचा ऐतिहासिक उपक्रम

लोकस्पर्श न्यूज नेटवर्क

विशेष प्रतिनिधी : सचिन कांबळे

नक्षलविरोधी कारवायांमध्ये प्राण पणाला लावणारे हे जवान आता पर्यावरणरक्षणाचीही जबाबदारी स्वीकारताना दिसतात, हा बदल केवळ प्रतीकात्मक नाही तर प्रेरणादायीही आहे. शस्त्र हाताळणारे हेच हात झाडू उचलून स्वच्छतेची गीता गातात, हे दृश्य समाजातील प्रत्येकाला आपली भूमिका ओळखून देणारे आहे.

अहेरी, २६ सप्टेंबर :

नक्षलवादाच्या रक्तरंजित इतिहासाला आव्हान देत शौर्याने लढणारे केंद्रीय राखीव पोलीस दलाचे (CRPF) जवान आज बंदुकीऐवजी झाडू हातात घेऊन रस्त्यावर उतरले आणि अहेरीकरांच्या मनात नवसंजीवनी निर्माण केली. “स्वच्छ भारताची शपथ, नक्षलवादाविरोधी लढ्याइतकीच कटिबद्ध” हे घोषवाक्य जणू हवेत दरवळले. भारत सरकारच्या ‘स्वच्छता ही सेवा’ अभियानांतर्गत (१७ सप्टेंबर ते २ ऑक्टोबर) सीआरपीएफ ३७ बटालियनने आज सकाळपासून अहेरी शहरात जोमदार श्रमदान, प्रबोधन आणि रॅलीचा जो धडाकेबाज उपक्रम राबविला, त्याने नागरिकांच्या मनात अभिमान आणि प्रेरणेची नवी ज्योत पेटवली.

“एक दिवस – एक तास – एक साथ” : रस्त्यांवर उठले अभिमानाचे तांडव…

कार्यवाहक कमांडंट सुजीत कुमार यांच्या नेतृत्वाखाली पहाटेपासूनच अहेरी बसस्थानक ते भाजी मंडई या मार्गावर जवान, विद्यार्थी, स्वयंसेवी संस्था, व्यापारी व ग्रामस्थ असा विराट जनसमुदाय घोषवाक्यांनी दुमदुमला. “माझं गाव – माझी जबाबदारी”, “नक्षलवाद हद्दपार – आता घाणही हद्दपार” अशी स्फूर्तीदायक घोषणा देत निघालेली रॅली नागरिकांना खिळवून ठेवत होती. नगर पंचायतचे कर्मचारी, हेल्पिंग हँड, उन्नती बहुउद्देशीय संस्था, स्थानिक महाविद्यालयांचे शिक्षक-विद्यार्थी यांचा उत्साह लाटेसारखा उसळला. रॅलीनंतर संपूर्ण भाजी मंडई परिसरात जवानांनी स्वतः झाडू हातात घेऊन कचऱ्याचे ढीग हटवले, नाल्यांतील घाणीचे साम्राज्य संपवले.

स्वच्छता म्हणजे फक्त मोहीम नव्हे – ती एक शपथ….

यानंतर निवडलेल्या Cleanliness Target Units (CTUs) मध्ये शंकरराव बेजलवार महाविद्यालयासमोरील रस्त्यांच्या कडेला सखोल स्वच्छता, कचरा संकलन, माहितीपर पोस्टर-बॅनरचे प्रदर्शन यासह नागरिकांना स्वच्छतेची शपथ देण्यात आली. “गाव स्वच्छ ठेवणे ही फक्त नगरपालिकेची जबाबदारी नाही, प्रत्येक नागरिकाने ती आपली कर्तव्य म्हणून निभावली पाहिजे,” असा ठाम संदेश जवानांनी दिला.

स्थानिकांची दाद, जवानांना सलाम..

या उपक्रमात नगर पंचायत अहेरीचे मुख्याधिकारी गणेश शहाणे, उपाध्यक्ष शैलेश पटवर्धन, नगर समन्वयक हरिदास पिल्लारे, नगररचना अभियंता जितेंद्र सहारे, शंकरराव बेजलवार महाविद्यालयाचे उपप्राचार्य डॉ. रवींद्र हजारे, हेल्पिंग हँड संस्थेच्या पूर्वा दंतुलवार, उन्नती बहुउद्देशीय संस्थेच्या सरिता कोंडलवार, चंद्रभागा मद्दीवार शाळेच्या उषा बोकडे, आर.डी. कॉलेज नागेपल्लीचे करण मेश्राम आदींसह असंख्य नागरिक सहभागी झाले. स्थानिकांनी “जे जवान नक्षलवाद झाडून काढतात, तेच आज गावाची घाणही झाडतात, हे आमच्यासाठी अभिमानाचे क्षण आहेत,” असे उद्गार काढत सलाम केला.

नव्या युगाची दिशा…

नक्षलविरोधी कारवायांमध्ये प्राण पणाला लावणारे हे जवान आता पर्यावरणरक्षणाचीही जबाबदारी स्वीकारताना दिसतात, हा बदल केवळ प्रतीकात्मक नाही तर प्रेरणादायीही आहे. शस्त्र हाताळणारे हेच हात झाडू उचलून स्वच्छतेची गीता गातात, हे दृश्य समाजातील प्रत्येकाला आपली भूमिका ओळखून देणारे आहे. अहेरीत आज जे घडले, ते फक्त ‘स्वच्छता ही सेवा’ मोहिमेचे औपचारिक पालन नव्हे; ती एका नक्षलग्रस्त भूमीची नव्याने होणारी घडण आहे. नक्षलवाद झाडणारे हे वीर जवान आता गावातील घाणही झाडतात, आणि यामुळे स्वच्छतेचा संदेश फक्त घोषणांपुरता न राहता लोकचळवळीत परिवर्तित होतो. सीआरपीएफ ३७ बटालियनच्या या अभूतपूर्व स्वच्छता शौर्यगाथेला अहेरीसह संपूर्ण गडचिरोली जिल्हा आणि देशही आज सलाम करत आहे.