उपेश अंबादे तुमसरचे नवे तहसिलदार

लोकस्पर्श न्यूज नेटवर्क

ओमप्रकाश चुनारकर 

मुंबई : नायब तहसिलदार संवर्गातील पात्र अधिकाऱ्यांना तहसिलदार संवर्गात तदर्थ पदोन्नती देण्याचा महत्वाचा आदेश महसूल व वन विभागाने गुरुवारी जारी केला. १४ नोव्हेंबर २०२५ रोजी प्रसिद्ध झालेल्या पदोन्नती–२०२५/ प्र.क्र.२२१/३४/ आस्था–३ क्रमांकाच्या शासन निर्णयानुसार उपेश शंकरराव अंबादे यांची तुमसर (जि. भंडारा) येथे तहसिलदार म्हणून नियुक्ती करण्यात आली आहे. ही पदोन्नती सामान्य प्रशासन विभागाच्या १४ जुलै २०२१ च्या अधिसूचनेनुसार आणि महसूल विभागाच्या १७ ऑगस्ट २०२२ च्या परिपत्रकानुसार करण्यात आली असून, त्याच दिवशी राज्य निवडणूक आयोगाने दिलेल्या निर्देशांचाही विचार शासनाने प्रक्रियेत घेतला आहे.

व्हॉट्सअॅप ग्रुप ही लिंक वापरून जॉइन करा

नागपूर महसूल मंडळातील सेवा-ज्येष्ठता क्रमांक ५८०८ असलेले अंबादे यांना तुमसर तहसीलमधील रिक्त पदावर पदस्थापना देण्यात आली आहे. राज्यातील विविध जिल्ह्यांमध्ये काम करताना त्यांनी दाखविलेली कर्तव्यनिष्ठता, काटेकोर शासकीय कामकाज आणि नागरिकाभिमुख दृष्टीकोन लक्षात घेता तुमसरमधील महसूल प्रशासन अधिक सुव्यवस्थित आणि वेगवान होण्याची अपेक्षा व्यक्त केली जात आहे.

अंबादे यांनी २०१४ ते २०१८ या काळात गडचिरोली जिल्ह्यातील वडसा येथे काम करताना दुर्गम, आदिवासीबहुल आणि नक्षलप्रभावित भागातही शासकीय कामकाज सुरळीत ठेवले. मर्यादित साधनसामग्री असूनही त्यांनी जमिनीचे वाद, प्रमाणपत्रे, मोजणी आणि तातडीची प्रकरणे वेळेत मार्गी लावत सर्वसामान्य नागरिकांमध्ये विश्वास निर्माण केला. गोरगरिबांना न्याय देणारा आणि लोकांपर्यंत सहज उपलब्ध राहणारा अधिकारी म्हणून त्यांची ओळख याच काळात दृढ झाली.

टेलिग्राम बातम्यांसाठी लिंक क्लिक करा

२०१८ ते २०२३ दरम्यान कुही (नागपूर) येथे त्यांनी आदिवासी व ग्रामीण भागातील प्रकरणे अत्यंत संवेदनशीलतेने हाताळली. महसुली प्रकरणातील अचूकता, वेळेवर निर्णय, तसेच थेट नागरिकांशी संवाद यामुळे त्यांच्या कामकाजाला स्थानिक पातळीवर मोठी दाद मिळाली. त्यानंतर नागपूर जिल्ह्यात त्यांनी जबाबदाऱ्या पार पाडताना निवडणूक कामकाजातील काटेकोर नियोजन, शांततेत मतदान प्रक्रिया पूर्ण करण्यासाठी घेतलेले उपाय आणि अंमलबजावणी यासाठी २०१९ मध्ये जिल्हास्तरावर ‘सर्वोत्कृष्ट नायब तहसिलदार’ सन्मानाने त्यांचा गौरव करण्यात आला.

कर्तव्यभावना, प्रामाणिकता आणि प्रशासनाशी एकनिष्ठ राहून नागरिकांच्या समस्या हाताळण्याची त्यांची कार्यशैली महसूल खात्यातील सहकाऱ्यांपासून सामान्य नागरिकांपर्यंत सर्वांकडून अधोरेखित केली गेली आहे. विविध स्तरांवर केलेल्या कामाच्या या पायावर त्यांची तुमसर तहसिलदार पदावर नियुक्ती अधिक अपेक्षांचे दायित्व घेऊन येत असल्याचेही शासनस्तरावर नमूद करण्यात येत आहे.

शासन आदेशात या पदोन्नतीचे स्वरूप तात्पुरते आणि तदर्थ असल्याचे स्पष्ट केले आहे. या नियुक्तीमुळे अधिकाऱ्यांना नियमित पदोन्नती, सेवाज्येष्ठता किंवा कोणताही कायदेशीर अधिकार आपोआप प्राप्त होत नाही. महसूल विभागातील रिक्त पदांमुळे स्थानिक प्रशासनावर वाढलेला ताण कमी करण्यासाठी आणि कामकाज सुरळीत ठेवण्यासाठी ही निवडसूची तातडीने जारी करण्यात आल्याचे मंत्रालयाकडून कळविण्यात आले आहे.