शेतकऱ्यांना सरसकट कर्जमाफी मिळालीच पाहिजे; काँग्रेसचे नेते विजय वडेट्टीवार यांचे सरकारवर जोरदार घणाघात

लोकस्पर्श न्यूज नेटवर्क 

नागपूर, १४ : राज्य सरकारकडून शेतकऱ्यांना न्याय मिळेपर्यंत प्रहार जनशक्ती संघटनेचे आमदार बच्चू कडू यांनी पुकारलेले आंदोलन चांगलेच पेटले असून, आता या लढ्याला काँग्रेस पक्षाने देखील उघड पाठिंबा जाहीर केला आहे. “शेतकऱ्यांच्या प्रश्नांवर समित्या नेमण्याऐवजी थेट निर्णय घ्या; सरकारला शेतकऱ्यांच्या मदतीसाठी लकवा मारलाय का?” असा सवाल उपस्थित करून काँग्रेस विधिमंडळ नेते विजय वडेट्टीवार यांनी सरकारवर जोरदार टीका केली आहे.

राज्यातील विविध भागात अवकाळी पावसाने शेतमालाचे मोठे नुकसान झाले आहे. कर्जबाजारीपणामुळे हवालदिल झालेल्या शेतकऱ्यांना सरकारने तातडीने दिलासा द्यायला हवा होता, मात्र समितींच्या नावाखाली वेळकाढूपणा चालू आहे, असा आरोप वडेट्टीवार यांनी केला. “निवडणुकीत हमीभाव, बोनस, कर्जमाफीची ग्वाही देणारे आता सत्तेत आल्यावर गप्प का?” असा सवालही त्यांनी केला.

महत्त्वाचे मुद्दे –

बच्चू कडू यांचे नागपूरमध्ये सुरू असलेले शेतकरी आंदोलन काँग्रेसच्या समर्थनामुळे अधिक धारदार…

शेतकऱ्यांच्या प्रश्नांवर सरकार समित्या नेमते, निर्णय मात्र लांबणीवर…

महाविकास आघाडी सरकारच्या काळात घेतलेला सरसकट कर्जमाफीचा निर्णय सत्तांतरानंतर पायदळी..

सरकारने दिलेली आश्वासने फोल, धोरणे शेतकऱ्यांना आत्महत्येच्या वाटेवर नेणारी..

वडेट्टीवार म्हणाले की, “मुंबईत उद्योगपतींसाठी कोट्यवधींची जमीन सहज दिली जाते, मात्र शेतकऱ्यांची थोडीशी कर्जमाफी सरकारला जड का जाते?” सरकारने आपले धोरण पुन्हा एकदा तपासावे आणि शेतकरी केंद्रस्थानी असलेले निर्णय घ्यावेत, अशी स्पष्ट भूमिका त्यांनी घेतली.

ते पुढे म्हणाले की, “राज्यातील शेतकऱ्यांचे प्रश्न ही केवळ आकडेवारी नसून लाखो कुटुंबांचे आयुष्य त्यावर अवलंबून आहे. आम्ही बच्चू कडू यांच्यासोबत आहोत. त्यांच्या मागण्या रास्त आहेत आणि सरकारने त्या तात्काळ मान्य करून अंमलबजावणी करावी.”

सरकारची विस्मरणाची नोंद?

महाविकास आघाडीच्या काळात नियमित कर्ज फेडणाऱ्या शेतकऱ्यांनाही लाभ मिळाल्याचे दाखवत वडेट्टीवार यांनी आताच्या सरकारच्या तुलनेत तीव्र विरोध केला. “आता मात्र शेतकऱ्यांना केवळ आश्वासनाचे गोळे देण्याचे काम सुरू आहे.” त्यांच्या म्हणण्यानुसार, सध्याचे सरकार शेती आणि ग्रामीण अर्थव्यवस्थेकडे केवळ राजकीय दृष्टिकोनातून पाहत असून, प्रत्यक्ष अंमलबजावणीसाठी इच्छाशक्ती नाही.

सरकारचा निर्णय नसेल तर संघर्ष नक्की – काँग्रेसचा इशारा..

काँग्रेसने बच्चू कडू यांच्या आंदोलनाला पाठिंबा देत, सरकारला ठोस निर्णयासाठी इशाराच दिला आहे. “जर सरकारने लवकरात लवकर शेतकऱ्यांसाठी ठोस निर्णय घेतला नाही, तर रस्त्यावर उतरण्याचा निर्णय आम्हीही घेऊ,” असा स्पष्ट संदेश काँग्रेसकडून देण्यात आला आहे.